თალიბების სამხედრო ქვედანაყოფები ქაბულში შევიდნენ, ავღანეთის პრეზიდენტი ჯერ არ გადამდგარა

მსოფლიო - 15:42, 15 Aug, 2021

2256

კვირას, 15 აგვისტოს, თალიბანის მებრძოლები ავღანეთის დედაქალაქ ქაბულში შევიდნენ. BBC-ის ინფორმაციით, თალიბები ქალაქში ძლიერ წინააღმდეგობას არ აწყდებიან. მათი ხელმძღვანელობა აცხადებს, რომ ისინი ქაბულში ძალადობას არ დაუშვებენ, ასევე დაცული იქნება იქ მყოფი ყველა უცხოელის უსაფრთხოება.

ვრცელდება ინფორმაცია, რომ ქაბულის საპატიმროებიდან პატიმრები გაიქცნენ.

თალიბებმა ასევე დაიკავეს "ბაგრამის" სამხედრო ავიაბაზა, რომელიც ავღანეთის ხელისუფლებას ამერიკელმა სამხედროებმა ქვეყნიდან გასვლის შემდეგ დაუტოვეს.

დღეისთვის, თალიბები, რამდენიმე რეგიონის გარდა, ავღანეთის მთელ ტერიტორიას აკონტროლებენ. დარჩენილი რეგიონები, მათი განცხადებით, სტრატეგიულ მნიშვნელობას არ წარმოადგენენ.

ამასთან, ვრცელდება ინფორმაცია, რომ პრეზიდენტი აშრაფ ღანი ჯერ არ გადამდგარა და ანშმად პრეზიდენტის სასახლეში ავღანეთის პოლიტიკურ პარტიებთან მოლაპარაკებებს აწარმოებს, მათ შორის "თალიბანის" წარმომადგენლებიც არიან.

მოსალოდნელია, რომ შეიქმნება დროებითი მთავრობა, სადაც როგორც "თალიბანის" ასევე მოქმედი ხელისუფლების წარმომადგენლები შევლენ.

პარალელურად, რუსული მედიის ცნობით, უზბეკეთმა ავღანეთთან საზღვრის გამაგერება დაიწყო.

აშშ, დიდი ბრიტანეთი და ევროკავშირი მიმდინარე მოვლენებზე კომენტარს ჯერ არ აკეთებენ.