აშშ-ის მარეგულირებელმა ორგანომ ნებართვა გასცა, რომ იმუნოკომპრესულ პაციენტებს კორონავირუსის საწინააღმდეგო ვაქცინის მესამე ე.წ. ბუსტერული დოზა გაუკეთონ- ინფორმაციას BBC ავრცელებს.

იმუნოკომპრომისულია პაციენტი - როდესაც სხეულის სისხლის თეთრი უჯრედები, რომლებიც ებრძვიან ინფექციებს, დაბალია, ასეთ დროს სხეულს არ შეუძლია ეფექტურად ებრძოლოს ინფექციებს. იმუნოკომპრომისულ პაციენტებად ითვლებიან ონკოპაციენტები, ვინც ქიმიოთერაპიის კურსს გადის, ვინც ჩაიტარა ტრანსპლანტაცია, აივ ინფექციის მქონე პაციენტები ან სხვა ცნობილი იმუნოდეფიციტის მქონე პაციენტები.

გამოცემის ცნობით, ექსპერტები ამბობენ, რომ ორი დოზის "Moderna" და "Pfizer" ვაქცინები ან ერთჯერადი დოზა "Johnson & Johnson" შეიძლება, საკმარისად არ დაიცვას ზოგიერთი ადამიანი, განსაკუთრებით მათ, ვისაც აქვს დასუსტებული იმუნური სისტემა.

მათივე ცნობით, სურსათისა და წამლის ადმინისტრაციის (FDA) მიერ გაცემული ბრძანება მოქმედებს დაახლოებით 10 მილიონ ადამიანზე, მათ შორის ორგანოგადანერგილებსა და ონკოპაციენტებზე. დაავადებათა კონტროლისა და პრევენციის ცენტრმა (CDC) ერთხმად დაუჭირა მხარი ე.წ. ბუსტერულ დოზას მოწყვლადი ჯგუფებისთვის. გამოცემის ცნობით, ე.წ. ბუსტერული დოზის გაკეთება შესაბამისი პირებისთვის მიმდინარე კვირის ბოლოდან იქნება ხელმისაწვდომი.