თავისა და სხეულის სხვადასხვა არეში ბლაგვი საგნით მრავალჯერადი დაზიანება მიაყენა და შემდეგ ცეცხლი წაუკიდა - ქუთაისის სასამართლომ სასტიკი მკვლელობისთვის ბრალდებულს 18 წლიანი პატიმრობა მიუსაჯა

სამართალი - 14:02, 11 Aug, 2021

1377

საქართველოს პროკურატურის ინფორმაციით, ქუთაისის სასამართლომ სასტიკ მკვლელობაში ბრალდებულს 18 წლიანი, ხოლო დანაშაულის შეუტყობინებლობისთვის ბრალდებულს - 4 წლიანი პატიმრობა მიუსაჯა. როგორც უწყების განცხადებაშია ნათქვამი, საქმე ეხება 2020 წლის 14 ნოემბერს მომხდარ მკვლელობას, რა დროსაც ბრალდებულმა მდინარე რიონნის სანაპიროსთან მოქალაქეს ბლაგვი საგნით მრავალჯერადი დაზიანება მიაყენა თავისა და სხეულის სხვადასხვა არეში და შემდეგ ცეცხლი წაუკიდა:

"პროკურატურის მიერ წარდგენილი მტკიცებულებების საფუძველზე, განსაკუთრებული სისასტიკით ჩადენილ განზრახ მკვლელობაში და დანაშაულის შეუტყობინებლობაში ბრალდებულებს 18 წლით და 4 წლით თავისუფლების აღკვეთა მიესაჯათ

ქუთაისის საქალაქო სასამართლომ სრულად გაიზიარა ბრალდების მხარის მიერ წარდგენილი მტკიცებულებები და განსაკუთრებული სისასტიკით ჩადენილ განზრახ მკვლელობაში ბრალდებული ზ.ზ. და ამავე დანაშაულის შეუტყობინებლობაში ბრალდებული გ.გ. დამნაშავედ ცნო.

შინაგან საქმეთა სამინისტროს მიერ ჩატარებული გამოძიების შედეგად, ბრალდების მხარის მიერ სასამართლო პროცესზე წარდგენილი მტკიცებულებებით დადასტურდა, რომ 2020 წლის 14 ნოემბერს, ქ. ქუთაისში, მდინარე რიონის სანაპიროსთან, ზ.ზ.-მ ურთიერთშელაპარაკების ნიადაგზე, განზრახ მოკვლის მიზნით, გ.მ.-ს მკვრივი ბლაგვი საგნის მრავალჯერადი დარტყმით თავისა და სხეულის სხვადასხვა არეში მრავლობითი დაზიანებები მიაყენა და შემდეგ ცეცხლი წაუკიდა. მიღებული დაზიანებების შედეგად, გ.მ. ადგილზე გარდაიცვალა, ხოლო ზ.ზ. შემთხვევის ადგილიდან მიიმალა. ზ.ზ.-ს მიერ ჩადენილი დანაშაულებრივი ქმედების შესახებ ცნობილი გახდა გ.გ.-სთვის, რომელმაც მომხდარის შესახებ არ შეატყობინა შესაბამის ორგანოებს.

სამართალდამცველებმა ზ.ზ. და გ.გ. 2020 წლის 16 ნოემბერს დააკავეს. ზ.ზ.-ს ბრალდება საქართველოს სისხლის სამართლის კოდექსის 109-ე მუხლის მესამე ნაწილის „ბ“ ქვეპუნქტით (განზრახ მკვლელობა ჩადენილი განსაკუთრებული სისასტიკით), ხოლო გ.გ.-ს საქართველოს სისხლის სამართლის კოდექსის 376-ე მუხლის მე-2 ნაწილით (განსაკუთრებით მძიმე დანაშაულის შეუტყობინებლობა) წარედგინათ. ორივე ბრალდებულს აღკვეთის ღონისძიების სახით პატიმრობა შეეფარდა.

ქუთაისის საქალაქო სასამართლომ ზ.ზ. და გ.გ. სრულად ცნო დამნაშავედ წარდგენილ ბრალდებებში და სასჯელის სახედ და ზომად ზ.ზ.-ს 18 წლის ვადით თავისუფლების აღკვეთა, ხოლო გ.გ.-ს 4 წლის ვადით თავისუფლების აღკვეთა განუსაზღვრა" - ნათქვამია განცხადებაში.