ხელოვნების მუზეუმის დასაცავად სამოქალაქო აქტივისტებმა პუშკინის სკვერში კიდევ ერთი აქცია-პერფორმანსი გამართეს. ისინი ითხოვენ გასაჯაროვდეს მუზეუმში დაცული უნიკალური მემკვიდრეობის ევაკუაციის გეგმა, რადგან ხელისუფლების მოქმედებებში რუსულ ინტერესებს ხედავენ.

აქტივისტების თქმით, დასაცავია გელათიც, სადაც ისტორიული ფრესკები ნადგურდება. მათი თქმით, საჭიროა გამოქვეყნდეს უცხოელი ექსპერტების მიერ მომზადებული დასკვნა, რომელიც გელათის ფრესკების მდგომარეობას ასახავს და დაიწყოს კონკრეტული ქმედებები ამ მიმართულებით.

შეგახსენებთ, გასულ თვეს კულტურის მინისტრმა, თეა წულუკიანმა განცხადება გაავრცელა, სადაც ნათქვამია, რომ შალვა ამირანაშვილის ხელოვნების სახელმწიფო მუზეუმის მძიმე ინფრასტრუქტურული მდგომარეობის გამო, მისი დაცლა მოხდება.