Bloomberg-ის ინფორმაციით, მსოფლიოში კორონავირუსის საწინააღმდეგო ვაქცინების გამოყენებული დოზების რაოდენობამ 4.27 მილიარდს გადააჭარბა.

ვაქცინაცია სულ 180 ქვეყანაში მიმდინარეობს და დღეში 42 მილიონი ადამიანი იცრება. ამ დროისთვის მსოფლიოში გამოყენებული ვაქცინები მოსახლეობის 27%-ის ორივე დოზით აცრისთვისაა საკმარისი.

ყველაზე მეტი 1.7 მილიარდი დოზა ჩინეთში გამოიყენეს. მას ინდოეთი მოჰყვება 488 მილიონი დოზით. ევროკავშირში ვაქცინების 479 მილიონი დოზა გამოიყენეს, აშშ-ში კი - 348 მილიონი. Bloomberg-ის მიხედვით, ამ დროისათვის მსოფლიოში ორივე დოზით მოსახლეობის 50%-ზე მეტი დაახლოებით 40 ქვეყანაში აიცრა. ევროკავშირში სრულად ვაქცინირებულია მოსახლეობის 50%, აშშ-ში 49%, დიდ ბრიტანეთში კი 58%.