კასპში სასტიკად მოკლული ნოდარ ღუნაშვილის ცოლს, ქეთი ჩხაიძეს, რომელიც სასჯელს დანაშაულის დაფარვისთვის იხდის, შესაძლოა ბრალი დაუმძიმდეს.

როგორც ჩხაიძის ჩვენებაში იყო ნათქვამი, გარდაცვლილმა თავის არეში დაზიანება დაცემის შედეგად მიიღო. ექსპერტიკის შედეგად კი გამოიკვეთა, რომ მას აღნიშნული დაზიანება ბლაგვი საგნით აქვს მიყენებული.

ღუნაშვილის ოჯახის ადვოკატის განცხადებით, ქეთი ჩხაიძემ ცრუ ჩვენება მისცა და შესაძლოა, ის დანაშაულში თანამონაწილე იყო:

"ექსპერტიზის დასკვნამ დაადგინა, შავით თეთრზე წერია, რომ ნოდარ ღუნაშვილის მიმართ მიყენებული თავის არეში დაზიანებები სრულად გამორიცხავს ქეთევან ჩხაიძის მიცემულ ჩვენებას, რომ მან დაზიანებები მიიღო დავარდნის შედეგად ზედაპირზე. ქეთევან ჩხაიძე იყო თანამონაწილე მკვლელობის, თუმცა გამოძიება გრძელდება", - აცხადებს ადვოკატი.

თავის მხრივ, ჩხაიძის ადვოკატი ჯაბა კოჭლამაზიშვილი აცხადებს, რომ მისი დაცვის ქვეშ მყოფს დანაშაულში მონაწილეობა არ მიუღია და ბრალის დამძიმების მოლოდინი არ აქვს.

შეგახსენებთ, ნოდარ ღუნასვილის ცხედარი კასპის სასაფლაოზე 14 მარტს იპოვნეს. მამაკაცს ყელი ჰქონდა გამოჭრილი.

გამოძიების შედეგად, პოლიციამ გარდაცვლილის ბავშვობის მეგობარი ზურაბ კახიშვილი სასტიკად ჩადენილი მკვლელლბის ბრალდებით დააკავა. დაკავებულია ღუნაშვილის ცოლიც, რომელსაც გამოძიება დანაშაულის შეუტყობინებლობას ედავება.