გორში ყოფილი მსჯავრდებული სერგო ბიძნოვი მოქმედ პოლიციელს ფიზიკურ და ფსიქოლოგიურ ძალადობაში ამხელს. მისი თქმით, თეიმურაზ გაბინაშვილი მამაკაცს აიძულებდა, სხვადასხვა პირებისთვის ნარკოტიკული საშუალებები ჩაედო, ხოლო მას შემდეგ, რაც მისგან უარი მიიღო, გადაეკიდა და სისტემატიურად ავიწროებდა. ამის შემდეგ ბიძინოვი უსაფუძვლო ბრალდებებით დააკავეს, გაბინაშვილი კი მსჯავრდებულის მეუღლესთან სექსუალური კავშირის დამყარებას ცდილობდა:

"თემურ გაბინაშვილი იყო უფროსი აქ სამმართველოსი, დამიბარა და მითხრა უნდა ითანამშრომლო ჩვენთანო, ვუთხარი თქვენთან ვერ ვითანამშრომლებო. ეგ დღე იყო და გადამეკიდა, ხან ვის მიგზავნიდა თანამშრომლებს, ქალაქი დატოვოსო, მერე პირადად სახლში შემოდიდოდა ღამის 2 საათზე, გააღებდა კარებს შემოდიოდა, მეუბნებოდა ადექი საქმე მაქვს, პარკებით, პლანს დადებდა აი ეს უნდა წაიღო იქ დატოვოო, მეთქი მე ეგეთი ადამიანი არ ვარ.

მე ვისაც დაგიკონკრეტებო, პლანი უნდა წამეღო, ჩამეგდო, რა უნდა მექნა არ ვიცი. ამაზე რომ მიიღო უარი აქეთ მე ჩამიდო ის პლანი და შემომტენა ქურდობა.

ადრე იყო შემთხვევა სუბოტექსს მოგცემთ და ეგეთი რაღაცეები. ხიდიდან გადავხტი მაგ თემურა გაბინაშვილის გამო. ფიზიკურადაც იყო შემთხვევბი, მეც ხელი შევუბრუნე ერთხელ თავის კაბინეტში და მერე ერთი 20-მა კაცმა გადამიარა ზედ", - აცხადებს სერგო ბიძინოვი.