დიდი ბრიტანეთის პარლამენტის წევრმა, რიჩარდ ჰოლდენმა წარადგინა კანონპროექტი, რომლის თანახმადაც ინგლისსა და უელსში საქალწულე აპკის შემოწმება და აღდგენა აიკრძალება.

ჯანმოსა და გაეროს განცხადებით, ქალწულობის ტესტი ადამიანის უფლებების შემლახველი, დისკრიმინაციული და უსარგებლა, რადგან აპკი შესაძლოა მრავალი მიზეზით დაზიანდეს, იქნება ეს ტამპონების გამოყენება თუ ვარჯიში.

ხოლო სამედიცინო ექსპერტები ამბობენ, რომ ჰიმენოპლასტიკა, ანუ ვაგინის შესასვლელთან მდებარე მემბრანული შრის აღდგენა ძალადობრივი და არასამეცნიერო პრაქტიკაა.

საერთაშორისო ორგანიზაციების განცხადებით, ასეთი "შემოწმება" შესაძლოა მნიშვნელოვანი ფსიქოლოგიური ტრავმის მიზეზი გახდეს.

რიჩარდ ჰოლდენის კანონპროექტს უკვე აქვს ქვეყნის ჯანდაცვისა და სოციალური დაცვის დეპარტამენტის მხარდაჭერა.

კანონის ძალაში შესვლის შემდეგ ამ პროცედურების შემსრულებელი ექიმები და მეანები შეიძლება დააპატიმრონ.