დღეს „ფაიზერის“ ვაქცინით აცრის მსურველთა რეგისტრაცია უნდა დაწყებულიყო, თუმცა მსურველები საიტზე შესვლას ვერ ახერხებდნენ. აღნიშნულ ფაქტს ჯანდაცვის კომიტეტის თავმჯდომარე დიმიტრი ხუნდაძე გამოეხმაურა.

მისი თქმით, ეს ერთი მხრივ, კარგია, რომ მოსახლეობის აქტივობა საკმაოდ მაღალია, იმდაგვარი, რომ ზოგჯერ გარკვეული ტექნიკური პრობლემებიც იქმნება:

„ვაქცინების კუთხით არჩევანის საშუალება, ხედავთ, რომ ეტაპობრივად იზრდება. ქვეყანაში უკვე შემოვიდა „ფაიზერის“ ვაქცინაც. მასზე მოთხოვნა ძალიან დიდი იყო; შესაბამისად, რეგისტრაციის პროცესიც საკმაოდ გადატვირთული იყო. ერთი მხრივ, კარგია, რომ მოსახლეობის აქტივობა საკმაოდ მაღალია, იმდაგვარი, რომ ზოგჯერ გარკვეული ტექნიკური პრობლემებიც იქმნება. მაგრამ ამ საკითხებთან დაკავშირებით ამ წუთშიც მიდის მუშაობა და პრობლემა უახლოეს საათებში მოგვარდება. მთავარია, რომ აქტივობა არ შევანელოთ, ანუ აცრის სურვილი არის პრაქტიკულად არა მხოლოდ საკუთარი ჯანმრთელობის დაცვა, არამედ სხვის ჯანმრთელობაზე ზრუნვაც. ხედავთ, რომ „დელტა“ შტამის სიჭარბემ გამოიწვია ბავშვთა ინფიცირების დინამიკის ზრდა. ამიტომ ავიცრათ, თუნდაც იმიტომ, რომ სახლში ბავშვებს ვირუსი არ მივუტანოთ. „მაგრამ თუ კიბერშეტევის რაიმე მცდელობები არის, შესაბამისი დარგის სპეციალისტები ამ მიმართულებითაც იმუშავებენ“, –განაცხადა ხუნდაძემ.