სისხლიანი ანგარიშსწორება რუსთავში - მკვლელობისა და დაჭრის ფაქტზე პოლიციამ ორი პირი დააკავა

კრიმინალი - 13:31, 14 Jul, 2021

1446

რუსთავში მომხდარი მკვლელობისა და დაჭრის ფაქტზე პოლიციამ ორი პირი დააკავა.

სისხლიანი გარჩევა გასულ ღამეს მოხდა - კამათით დაწყებული დაპირისპირების დროს ჩხუბში მონაწილე პირებმა ორ ახალგაზრდას ცივი იარაღით ჭრილობები მიაყენეს. ერთ-ერთი დაჭრილი მიღებული დაზიანებებისაგან სასწრაფო დახმარების მისვლამდე გარდაიცვალა, მეორე კი საავადმყოფოში გადაიყვანეს, სადაც გადაუდებელი ოპერაცია ჩაუტარდა. მისი მდგომარეობა ამჟამად მძიმეა.

შსს-ს ინფორმაციის თანახმად, დაკავებულები არიან 20 წლისა და 35 წლის მამაკაცები, გამოძება კი საქართველოს სსკ-ის 108-ე, 19-109-ე მუხლებითა და 376-ე მუხლის მეორე ნაწილით მიმდინარეობს:

"შინაგან საქმეთა სამინისტროს ქვემო ქართლის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიულ-სამძებრო და საგამოძიებო ღონისძიებების შედეგად, ორი პირი - 2001 წელს დაბადებული ნ.დ. და 1986 წელს დაბადებული გ.ჩ. დააკავეს.

ნ.დ.-ს ბრალად ედება განზრახ მკვლელობა და ორი ან მეტი პირის მიმართ დამამძიმებელ გარემოებაში ჩადენილი განზრახ მკვლელობის მცდელობა, გ.ჩ.-ს კი - განსაკუთრებით მძიმე დანაშაულის შეუტყობინებლობა.
გამოძიებით დადგინდა, რომ ნ.დ.-მ ქალაქ რუსთავში, თოდრიას ქუჩაზე, ურთიერთშელაპარაკებისას, ცივი იარაღის გამოყენებით დაჭრა 1994 წელს დაბადებული გ.ბ. და ამავე წელს დაბადებული გ.ა., რის შემდეგაც შემთხვევის ადგილიდან თანმხლებ პირთან - გ.ჩ.-სთან ერთად მიიმალა. დაჭრილი გ.ა. საავადმყოფოში მიყვანისთანავე გარდაიცვალა, ხოლო გ.ბ.-ს შესაბამისი მკურნალობა უტარდება.
გ.ჩ.-მ მომხდარი ფაქტის შესახებ პოლიციას არ შეატყობინა.
განზრახ მკვლელობის, ასევე, ორი ან მეტი პირის მიმართ დამამძიმებელ გარემოებაში ჩადენილ განზრახ მკვლელობის მცდელობისა და განსაკუთრებით მძიმე დანაშაულის შეუტყობინებლობის ფაქტებზე გამოძიება საქართველოს სსკ-ის 108-ე, 19-109-ე მუხლებითა და 376-ე მუხლის მეორე ნაწილით მიმდინარეობს" - ნათქვამია ინფორმაციაში.