ინსბურგის სამედიცინო უნივერსიტეტის რადიოლოგიის ცენტრის უფროსი ექიმი, ირმა კვიცარიძე სოციალურ ქსელში შს სამინისტროს მიერ გავრცელებულ ვერსიას ეხმაურება. საუბარია გუშინდელ ბრიფინგზე გაჟღერებულ ვერსიაზე რომლის მიხედვითაც ალექსანდრე ლაშაქარავა შესაძლოა, ნარკოტიკული საშუალებებით ზედოზირების შედეგად გარდაიცვალა. კვიცარიძე წერს:

„ზედოზირებაო! “ნარკანს” მოპედით ეძებდა აფთიაქებშიო! არადა, ნარკანის საჭიროება როცა დგება, ის ძალზე სწრაფად უნდა გამოიყენო, ისე აზრი ეკარგება მის “ძებნას”!

კოლეგებო, უხერხულია დუმილი, ბევრი თქვენგანი კოვიდ ექსპერტებადაც ჩამოყალიბდით!

მსოფლიოს წამყვანი კლინიკების მიმღებ განყოფილებებს და რეანიმაციებს (ემერჯენსის ხსენება უფრო მიგწონთ) „ნამდვილი წარმატებული“ ქართველი ექიმებით უდგია სული! ჰოდა, “ნარკანის” ქუჩა-ქუჩა ძებნის ვერსიამ არ შეგაწუხათ პაწა?!

უხერხულია და სირცხვილი!

იქნებ, ჯორჯ ფლოიდის აუტოფსიის დასკვნაში რა წერია, ისიც გააჟღეროთ! ინგლისური კარგად იცით და სტატიებსაც უთარგმნით საზოგადოებას! მიუხედავად უამრავი მიზეზისა, დასკვნაში წერია, რომ ის სისტემამ შეიწირა!“ - წერს იგი.