სათამაშო სექტორი პანდემიამდე საქართველოს ეკონომიკის ერთ-ერთი ყველაზე სწრაფად მზარდი სეგმენტი იყო. ჯერჯერობით, ამ სექტორის ყველა მოთამაშის 2020 წლის შედეგები საჯაროდ გამოქვეყნებული არაა, თუმცა როგორც “კრისტალბეთის” ფინანსური ანგარიშიდან ირკვევა, კომპანიისთვის 2020 წელი განსაკუთრებულად მოგებიანი იყო.

reportal.ge-ზე გამოქვეყნებული აუდიტირებული ფინანსური ანგარიშის თანახმად, 2020 წელს “კრისტალბეთის” შემოსავალი 39%-ით 363.3 მილიონ ლარამდე გაეზარდა, კომპანიის წმინდა მოგება კი 87%-ით გაიზარდა და 177 მილიონი ლარი გახდა.

177 მილიონი ლარის მოგება ქვეყნის მასშტაბით წმინდა მოგების ერთ-ერთი ყველაზე მაღალი მაჩვენებელია; შედარებისთვის ეს თანხა ქართული ბანკების უმრავლესობის 2019 წლის მოგებასაც აღემატება.

ფინანსური ანგარიშის თანახმად, "კრისტალბეთის" 363.3-მილიონიანი შემოსავლები წყაროების მიხედვით ასე ნაწილდება:

● შემოსავალი ონლაინკაზინოს თამაშებიდან - 270.6 მილიონი ლარი, მატება წინა წელთან 53%;

● შემოსავალი ონლაინ ტოტალიზატორიდან - 70.3 მილიონი ლარი, კლება წინა წელთან -1%;

● შემოსავალი ონლაინ peer-to-peer თამაშებიდან - 11.25 მილიონი ლარი, მატება წინა წელთან 6%;

● სხვა შემოსავალი მომხმარებლებთან გაფორმებული ხელშეკრულებებიდან - 11.12 მილიონი ლარი, მატება წინა წელთან 437%.

ჯგუფი “კრისტალბეთის” იურიდიული სახელია შპს “მარსი”. ფინანსური ანგარიშის თანახმად, კომპანია 2005 წლის 5 მაისს არის რეგისტრირებული და მისი მაჟორიტარული წილის მფლობელი მალტაზე რეგისტრირებული ფირმა Bwin Holdings-ია. კომპანიის მესაკუთრეთა სია ასეთია:

“Bwin Holdings (Malta) Limited - 51%; ლევან ახვლედიანი - 24%; კნიაზ დასენი - 10%; გიორგი ჩხეიძე - 5%; კობა გიგლემიანი - 5%; ვანო გიგლემიანი - 5%,” - ნათქვამია კომპანიის ფინანსურ ანგარიშში.

რაც შეეხება კომპანიის საოპერაციო ხარჯებს, ის 2020 წელს 158.5 მილიონი ლარი იყო.

წყარო: bm.ge