საგამოძებო სამსახურმა 7 340 ლარის უაქციზო ელექტრო სიგარეტის შენახვა-რეალიზაციის ფაქტზე ერთი პირი დააკავა - ინფორმაციას ფინანსთა სამინისტრო ავრცელებს. უწყების ცნობით, გამოძიება მე-200 მუხლით მიმდინარეობს და ბრალის დამტკიცების შემთხვევაში დაკავებულს 4-დან 6წლამდე პატიმრობა ემუქრება:

"საქართველოს ფინანსთა სამინისტროს საგამოძიებო სამსახურის თანამშრომლებმა, გატარებული ოპერატიულ-სამძებრო ღონისძიებების და საგამოძიებო მოქმედებების შედეგად, მარკირებას დაქვემდებარებული აქციზური საქონლის აქციზური მარკის გარეშე შენახვა-რეალიზაციის ფაქტზე, ერთი პირი დააკავეს.

ჩხრეკის შედეგად ამოღებულ იქნა სარეალიზაციოდ განკუთვნილი 367 ცალი „STIX“-ის ფირმის ნიკოტინის შემცველი უაქციზო ელექტრო სიგარეტი. ამოღებული საქონლის ჯამური საბაზრო ღირებულება შეადგენს 7 340 ლარს.

გამოძიება მიმდინარეობს საქართველოს სისხლის სამართლის კოდექსის მე-200 მუხლის მე-2 ნაწილით, რაც სასჯელის სახით ითვალისწინებს თავისუფლების აღკვეთას 4-დან 6 წლამდე ვადით" - ნათქვამია ინფორმაციაში.