სამეგრელოში მომხდარ ფაქტს ფსიქოლოგი ნათია ფანჯიკიძე სოციალურ ქსელში ეხმიანება და წერს, რომ სექსუალური განათლების მიღება აუცილებელია, რათა ყველა მშობელმა იცოდეს, სად იმალება საშიშროება და მაქსიმალურად უზრუნველყოს ბავშვისთვის უსაფრთხო გარემო და ასევე ყველა ბავშვმა იცოდეს, რა სახის ქმედება არ არის დაშვებული მის მიმართ.

როგორც ფანჯიკიძე წერს, ძალადობის მსხვერპლ ბავშვებს და მოძალადის შვილებსაც ხანგრძლივი ფსიქორეაბილიტაცია ესაჭიროებათ, რათა ჯანსაღი ცხოვრების გაგრძელება შეძლონ.

მისივე თქმით, პედოფილია სამუდამო პატიმრობით უნდა ისჯებოდეს.

„პედოფილიის შემთხვევების უმეტესობა ახლო წრეში, ნაცნობ გარემოში ხდება, რადგან მცირეწლოვანი ბავშვი იშვიათად ხვდება სრულიად უცხო გარემოში. სექსუალური განათლება ამიტომ არის აუცილებელი, რომ ყველა მშობელმა იცოდეს, სად იმალება საშიშროება და მაქსიმალურად უზრუნველყოს ბავშვისთვის უსაფრთხო გარემო და ყველა ბავშვმა იცოდეს, რა სახის ქმედება არ არის დაშვებული მის მიმართ. პედოფილი, რომელიც სასტიკ ძალადობას ჩადის, ყოველთვის რჩება საზოგადოებისთვის საშიშ პირად, ამიტომ უნდა ისჯებოდეს სამუდამო პატიმრობით. ძალადობის მსხვერპლ ბავშვებს ესაჭიროებათ ხანგრძლივი ფსიქორეაბილიტაცია, იმისათვის, რომ შეძლონ ნორმალური ცხოვრების გაგრძელება. მოძალადის შვილებსაც ესაჭიროებათ ფსიქორეაბილიტაცია, იმავე მიზნით, რომ შეძლონ ჯანსაღი ცხოვრების გაგრძელება“, – წერს ნათია ფანჯიკიძე.