ცნობილი პროფესორს, ჯემალ გაბელიას შვილიშვილის გარდაცვალებას უსამძიმრებენ. მოზარდი საცხოვრებელი კორპუსის მეხუთე სართულიდან გადავარდა და გარდაიცვალა.

„უფლის სამართალს ვერ განვიკითხავ, მაგრამ სიკეთე რომ დასჯადია, კიდევ ერთხელ დავრწმუნდი! კლდესა და ქვას გახეთქავს ის შემზარავი ტრაგედია, რაც ჩემი უახლოესი ადამიანების გაბელია-გოგიჩაიშვილების ოჯახებში დატრიალდა! 13 წლის ულამაზესი ნია საბედისწერო ბავშვური შეცდომის გამო ცის ანგელოზად იქცა… მთელი ღამე კოშმარში გავატარე, ცოცხლად სიკვდილს ნიშნავს მეგობრების შვილ-შვილიშვილის სიკვდილი, ნატვრას იმისას, რომ ნეტა შეგეძლოს, რომ ეს სიკვდილი გაუცვალო შენს საკუთარ სიკვდილში; სულის შემძვრელია ისმინო შოკირებული, გულგაგლეჯილი დედა, ახლანდელ დროში როგორ აგრძელებს გარდაცვლილ შვილზე საუბარს და პირდება, რომ ნიაკო უეჭველად გაემგზავრება გერმანიაში და იქნება ძლიერი კარდიო-ქირურგი!..როგორ ემუდარება ბაბუა ჯემალი შვილიშვილს მალე გაიყვანოს ამქვეყნიდან, ყველაფერში მისაბაძი ჩემი რუსო ბებო, ამ უდიდესი ტრაგედიის დროსაც ცხარე ცრემლით როგორ გოდებს, უხმაუროდ! ვერასოდეს წარმოვიდგენდი, ასეთი გლოვაც თუ არსებობდა, ასეთი ჩუმი და გაუბოროტებელი…

„სიტყვა ვერ დაიტევს თქვენ ნუგეშს, მაგრამ ირწმუნეთ, რომ ნიაკო არის დედამიწის ელჩი, ანგელოზად ცაში აყვანილი, რომელიც თქვენ ტკივილს, გაუსაძლისს, იქიდან უწამლებს, ხშირად მოფრინდება ღამ-ღამობით და ყველაზე მეტხანს დედის სარკმელთან შეყოვნდება, მერე აიკეცავს თავის პატარა ფრთებს, გამჩენელმა რომ შეასხა, ავა უფალთან და ღვთისმშობლის კალთაში მიდებს თავს! ყველა თქვენგანის საფიცარი გოგონას თავსასთუმალი აწ უკვე ღვთისმშობლის კალთაა… ღვთისმშობელს ეფერეთ. ძნელია ამ ყველაფრის გასიგრძეგანება, მაგრამ ასეა“.

„ადამიანის სიცოცხლე იმდენად ხანმოკლეა რომ ნებისმიერი ადამიანი, ვინც ამ ქვეყნიდან ზეციურ საუფლოში ინაცვლებს, უზარმაზარ ტკივილს ტოვებს ახლობელთა გულებში….მაგრამ როდესაც საქმე ეხება პატარა ანგელოზის ზეციურ ანგელოზთა დასთან შეერთებას ეს ენით აღუწერელი ტკივილია…ასეთი ტკივილით დამუნჯებული დავდივართ მთელი დეპარტამენტი და სანუგეშებელი სიტყვები ვერ მოგვიძებნია….გამაგრდით კარგო ადამიანო….კარგო მამა და ბაბუავ…..გამაგრდით ბატონო ჯემალ….თქვენ ჭირდებით თქვენს ოჯახს…… ახლობლებს…… თქვენ ჭირდებით სამართლის დეპარტამენტს… შეგეწიოთ და გფარავდეთ უფალი“.

„ბ-ნო ჯემალ, სიტყვები არ მაქვს.. არ ვიცი, როგორ განუგეშოთ.. ეს ულამაზესი ფერია, პატარა ანგელოზი ზეცაში შეუერთდა ანგელოზთა დასს.. ჩვენ, ამ ქვეყნად, ალბათ ვერასოდეს გავიაზრებთ რატომ ხდება ასე.. ღმერთმა გაგაძლიეროთ“ – წერენ ახლობლები.

ცნობისთვის, ტრაგედია თბილისში, აბაშიძის ქუჩაზე, რამდენიმე დღის წინ მოხდა. გოგონა გადავარდნის შემდეგ, სასწრაფო დახმარების ბრიგადამ კლინიკაში გადაიყვანა, თუმცა მისი გადარჩენა ვერ მოხერხდა.