ოკუპირებულ ცხინვალში დაპატიმრებულ ზაზა გახელაძის ოჯახში სასულიერო პირები მივიდნენ - ამ წუთებში ზაზა გახელაძის ოჯახის წევრებს გორისა და ატენის მიტროპოლიტი მეუფე ანდრია და კასპისა და სამთავისის მიტროპოლიტი მეუფე დამეანე ხვდებიან.

ზაზა გახელაძის ოჯახის წევრები სასულიერო პირებთან და ეპარიის ხელმძღვანელებთან შეხვედრას, 15 ივნისს ერგნეთში, უშედეგოდ დასრულებული შეხვედრის შემდეგ ითხოვდნენ და მათ ზაზა გახელაძის გათავისუფლებაში დახმარებას სთხოვდნენ.

დღეს ქვემოჭალაში გახელაძეებთან შესახვედრად არ ჩასულა, ცხინვალისა და ნიქოზის მიტროპოლიტი მეუფე ისაია, რომელიც ოკუპირებულ ახალგორშიც პერიოდულად გადადის.

შეგახსენებთ, რომ ხვალ, 23 ივნისს , ცხინვალის საოკუპაციო რეჟიმის მიერ უკანონოდ დაკავებული ზაზა გახელაძის დაბადების დღეა.

მისმა ოჯახმა მისი გათავისუფლების თხოვნით არაერთხელ მიმართა საქართველოს ხელისუფლებას. ისინი შეხვდნენ ირაკლი ღარიბაშვილს, ასევე პარლამენტის ყოფილ თავმჯდომარეს, არჩილ თალაკვაძეს. მიიღეს დაპირებებიც, რომლიც ამ დრომდე არ შესრულდა.

ზაზა გახელაძის მამა, მიხეილ გახელაძე ამბობს, ის ხვალ გადავა ოკუპირებულ ტერიტორიაზე, მისი ოჯახი კი საპროტესტო აქციას გააგრძელებს.