"ყელს გამოგჭრი და მოგკლავ" - რუსთავში მამაკაცი მოქალაქეებს დანით ემუქრებოდა

კრიმინალი - 11:28, 20 Jun, 2021

1404

„ინფო რუსთავის“ ინფორმაციით, რუსთავში, მეგობრობის გამზირზე დანით შეიარაღებული მამაკაცი რამდენიმე პირს თავს დაესხა.

კაცი განსაკუთრებით აგრესიული ქუჩაში გაჩერებული ტაქსის მძღოლის მიმართ აღმოჩნდა, რომელსაც ყელის გამოჭრით ემუქრებდა.

"მოვიდა და დანას მიტრიალებდა, ყელს გამოგჭრი და მოგკლავო", - აცხადებს მძღოლი.

თვითმხილველების თქმით, შეიარაღებულ კაცს სიტყვიერი დაპირისპირება ფაქტის შემსწრე სხვა პირებთანაც ჰქონდა.

"მოვიდა ამ კაცთან, პირბადე მოგლიჯა და გინება დაუწყო. აქ ერთი ბიჭი იყო ამ დროს და იმან უთხრა გაჩერდი, რა დღეში ხარო. შენც გიცნობ, იმასაც ვიცნობ, ორივეს მოგაჭრით თავსო ასე უპასუხა. გაჩერდა ეს კაცი, თორემ შეიძლება დაერტყა პასუხი რომ გაეცა", - იხსენებს ერთ-ერთი გარემოვაჭრე.

მამაკაცის მხრიდან მუქარა და სიტყვიერი შეურაცხყოფა დაახლოებით 30 წუთის განმავლობაში გაგრძელდა. მოქალაქეებმა პოლიცია გამოიძახეს, თუმცა 60 წლამდე კაცი ადგილიდან მიიმალა.

სამართალდამცავებმა შეიარაღებული პირის იდენტიფიცირება და პოვნა მალევე შეძლეს.

"ინფო რუსთავის" ინფორმაციით, სასწრაფო-სამედიცინო დახმარების ეკიპაჟმა მამაკაცი რუსთავის ფსიქიატრიულ კლინიკაში გადაიყვანა, თუმცა სამედიცინო დაწესებულებაში ის არ მიიღეს.

როგორც საინფორმაციო სააგენტოს კლინიკაში განუცხადეს, მიზეზი ადგილების არარსებობა გახდა.

"ჩვენ ფიზიკურად ადგილი არ გვაქვს, ამის შესახებ მოვახსენეთ საპატრულო პოლიციას, შევადგინეთ ოქმი და გავუშვით. ფიზიკურად ვერ მივიღებთ", - განუცხადა "ინფო რუსთავს" კლინიკის მორიგე ექიმმა, მარიამ მამრიკიშვილმა.