19 წლის ფეხბურთელი გიორგი შაქარაშვილი, გასული წლის 18 ივნისს მცხეთის ტერიტორიაზე გაუჩინარდა - ტრაგედიიდან ერთი წელი გავიდა…

შაქარაშვილის დედა, თამუნა შავლაშვილი, სოციალურ ქსელში ემოციურ პოსტს აქვეყნებს, რომელსაც "ნიუპოსტი" უცვლელად გთავაზობთ:

"-გიო, ხვალ მე თუ შენ?

-მე!

-თუ შენ, მაშინ მე გამომყევი, არავითარი სალონი, არავითარი იუბილე, მე და შენ მივდივართ სასამართლოში.

-ასეთი კატეგორიულიც ნუ იქნები, დაბადების დღეზე მელოდებიან.

-ნუ გიო, ნუ წახვალ, გთხოვ…

-დილას შენს საქმეზე წავიდეთ, შენ დაბეჯითებით და მტკიცედ ისაუბრე, ისე, როგორც იცი, სამართლიანად და შეუპოვრად. მე კი გვერდით გედგები უხილავად და გაგამხნევებ.

-ეგ კი, მაგრამ საღამოს?

-ნუ დაიჟინებ, სულ ცოტა ხნით გავქროლდები ქალაქგარეთ, ერთ გოგონას ოქროს იუბილედან ახალ ათვლას მივულოცავ და მალე წამოვალ.

-აღარ აღნიშნავს ის გოგონა დაბადების დღეს, გადაიფიქრა.

-შენ რა იცი?

-არა, არ ვიცი, მაგრამ იოტისოდენა თანაგრძნობის უნარი რომ გააჩნდეს, საკუთარი დაბადების დღე ყოველ წელს ძაძით უნდა შემოსოს!

-შენ რომ ასეთი არ ხარ, არც მსგავსი რამ რომ არ წამოგცდენია არასდროს, ახლა რა დაგემართა?

-რა და, რასაც ვგრძნობ და ვფიქრობ, იმას ვამბობ!

-მერე რატომ ფიქრობ ასე მკაცრად და სასტიკად?

-ალბათ გინდოდა გეთქვა, დამსახურებულად…

-კარგი, ნუ ჩაუღრმავდები ასე…

გადავიფიქრე, აღარ მივდივარ.

-რა კარგია, გადარჩები…

-კარგი, ვთქვათ მე გადავრჩი, სხვა?

იგივე გზაზე, იგივე ღამეს, იგივე ხალხის პირისპირ…

-შენ არა, მაშინ მე…

პ. ს. -ჰმ, მე სად წავიდე?..

-შენ მიშოს მიულოცე, ხვალ მისი დაბადების დღე არის, ოცი წლის იუბილე. შენკენ სავალი გზის ძებნაში მასაც ხომ შემოაღამდა…

-მიშო ისედაც სულ ჩემთან არის, წამითაც არ ვიშორებ გვერდიდან…

-შარშან ერთად რომ წასულიყავით, ნეტავ რა და როგორ იქნებოდა, გიო?..

-იგივე, რაც დღეს…" ,- წერს თამუნა შავლიაშვილი.