მიუხედავად იმისა, რომ დღეს საპატრიარქოში გამართული შეხვედრის შემდეგ საპატრარქოს საზოგადოებასთან ურთიერთობის სამსახურის ხელმძღვანელმა ანდრია ჯაღმაიძემ მედიასთან განაცხადა, რომ ნინოწმინდის პანსიონის დახურვა არ იგეგმება, ჯანდაცვის მინისტრის მოადგილემ თამარ ბარკალაიამ აღნიშნა, რომ პანსიონის დახურვა ავტომატურად მოხდება:

"2022 წლის 1-ლი აპრილი არის ყველაზე ბოლო ვადა, რომელიც კანონმდებლობით არის განსაზღვრული, მაგრამ მანამდე ჩვენ ვაგრძელებთ მათი პრობლემების იდენტიფიცირებას და ალტერნატიულ სერვისებში გადაყვანას.

ავტომატურად მოხდება პანსიონის დახურვა და ალტერნატიული სერვისების გაძლიერება მცირე საოჯახო სახლების სახით. დღევანდელ შეხვედრაზე იყო საუბარი, რომ ეს პროცესი იყოს გამჭვირვალე ყველასთვის.

პანსიონში არიან ბავშვები, რომლებსაც აქვთ მიჯაჭვულობა იქაურ მზრუნველებთან, იმიტომ, რომ მათ აღიქვამენ, როგორც მშობლებს. მათი გარემოდან მყისიერი გამოგლეჯა პირველ რიგში ეწინააღმდეგება მათ ინტერესებს.

ვადების დასახელება რთულია, ვინაიდან ყველა ბავშვის საჭიროება და მათი შესაბამისი ალტერნატიული ზრუნვა არ არის შეფასებული.

მიმდინარეობს ნინოწმინდის პანსიონში მცხოვრები ბავშვების შეფასება სოციალური მუშაკების მიერ, მათ შორის პანსიონში 24 საათის განმვალობაში. ასევე ვმუშაობთ ოჯახების მოძიებასა და გაძლიერებაზე იმისთვის, რომ მოხდეს, პირველ რიგში, ოჯახებში ინტეგრაცია" - განაცხადა ბარკალაიამ.