სოფლის მეურნეობის მინისტრის მოადგილე დავით გალეგაშვილი საქართველოს მეცხვარეთა ასოციაციის პირველი კონფერენციას დაესწრო.

კონფერენციაში მონაწილეობის მისაღებად და მეცხვარეობის დარგის აქტუალურ თემებზე სასაუბროდ, თბილისში კახეთიდან და ქვემო ქართლიდან ოცდაათამდე მეცხვარე ჩამოვიდა. შეხვედრას ასევე ესწრებოდნენ აგრარული კომიტეტის თავმჯდომარე გიგლა აგულაშვილი, სოფლის მეურნეობის სექტორის ასოციაციების და არასამთავრობო ორგანიზაციების წარმომადგენლები.

მეცხვარეებმა ისაუბრეს საძოვრებზე მაღალი საიჯარო გადასახადების, პირუტყვის გადასარეკი ტრასების ინფრასტრუქტურის, ცხვრის გასაღების ბაზრების, პირუტყვის გავრცელებული დაავადებების, სადაზღვევო სისტემის არარსებობის და დარგში არსებულ კიდევ მრავალ აქტუალურ საკითხზე.

„ჩვენ მზად ვართ თქვენთან ერთად დავიწყოთ მუშაობა მეცხვარეობის განვითარების სახელმწიფო პროგრამაზე, რადგან საკითხი კომპლექსურია და სისტემურ მიდგომას საჭიროებს. მომავალი წლიდან მეცხვარეებს მეტი შესაძლებლობა ექნებათ გამოიყენონ შღავათიანი აგროკრედიტის სახელმწიფო პროგრამა, რომელიც მომავალი წლიდან უკვე სახეშეცვლილი იქნება, ახალი ფორმულით, სადაც 50 პროცენტი სახელმწიფო გრანტი იქნება, 40 პროცენტი კრედიტი, ხოლო დარჩენილი 10 პროცენტი - ფერმერის მხრიდან თანადაფინანსება. ასევე მომავალი წლის ბიუჯეტში უკვე ჩადებულია მეცხოველეობის სასელექციო ფერმის გაკეთება, რაც თავისთავად ცხვარსაც მოიცავს,” _ განაცხადა კონფერენციაზე სოფლის მეურნეობის მინისტრის მოადგილემ დავით გალეგაშვილმა.

კონფერენციის ბოლოს მონაწილეებმა ქვეყნის ხელისუფლებისადმი სპეციალური მიმართვის ტექსტი შეიმუშავეს, სადაც ხაზი გაუსვეს თავიანთ მზადყოფნას ქვეყნის ხელისუფლებასთან ერთად დაიწყონ მუშაობა მეცხვარეობის დარგის განვითარებისთვის.