პორტალ "Прайм Крайм"-ის ცნობით, რუსეთის სასამართლომ "კანონიერ ქურდ" თენგიზ გიგიბერიას (თენგო პოტიისკი) გამამართლებელი განაჩენი გამოუტანა. ლიპეცკელმა მოსამართლემ მიიჩნია, რომ ბრალდებამ ვერ წარმოადგინა სათანადო მტკიცებულებები იმის თაობაზე, რომ იგი მართლაც "ქურდული სამყაროს" უმაღლეს იერარქიას მიეკუთვნებოდა. გარდა ამისა, განაჩენში ნათქვამია, რომ პროკურატურამ არ წარმოადგინა, თუ როგორ შეუძლია ქურდს უარი თქვას თავის სტატუსზე.

სასამართლო სხდომის დროს გიგიბერიამ უარი თქვა "კანონიერი ქურდის" სტატუსზე და "ყველა წმინდანს იფიცებდა", რომ იგი თავს დაანებებს დანაშაულებების ჩადენას და ოჯახს დაუბრუნდება, რადგან მას 2 მცირეწლოვანი შვილი ჰყავს, რომლებიც არასდროს უნახია.

ეს რუსეთში პირველი გამამართლებელი განაჩენია, რომელიც ქვეყნის სს კოდექსის 210.1-ე მუხლით ("დანაშაულებრივ იერარქიაში უმაღლესი მდგომ,არეობის დაკავება") ბრალდებულ პირს გამოუტანეს. გიგიბერიას სასჯელი 2020 წლის სექტემბერში დაუმთავრდა, მაგრამ ვადის გასვლამდე მას ბრალი ხელახლა წაუყენეს ზემო აღნიშნული მუხლის შესაბამისად.

გამოძიების თანახმად, გიგიბერია "ქურდად" 1997 წელს "აკურთხეს", ხოლო "ქურდული ტატუ" მან სხეულზე არაუგვიანეს 2011 წლისა გაიკეთა. იგი ადრე გასამართლებული იყო იარაღის უკანონო ტარების, ყაჩაღობისა და მკვლელობისთვის. საერთო ჯამში მან ციხეში 17 წელი გაატარა. აქვე მოყვანილი იყო მაგალითი, რომ გიგიბერიას სხვა პატიმრები ყოველთვიურად 4 ათასამდე რუსულ რუბლს ურიცხავდნენ.

პროკურატურა, რომელიც გადაწყვეტილების გასაჩივრებას აპირებს ასევე ამტკიცებდა, რომ "კანონიერი ქურდის" სტატუსზე უარის თქმა მხოლოდ "ქურდულ სხოდკაზე" სხვა ქურდების თანდასწრებით არის შესაძლებელი.

გიგიბერიას სურს, რომ რუსეთიდან მისი სამშობლოში დეპორტაცია მოხდეს.