საქართველოს საპატრიარქო ნინოწმინდის პანსიონის გარშემო განვითარებულ მოვლენებს განცხადებით ეხმაურება და შინაგან საქმეთა სამინისტროს მიმართავს, გაასაჯაროვოს ის საქმეები, რომლებზეც გამოძიება დაიწყო.

როგორც განცხადებაშია ნათქვამი, მათთვისაც ახლა გახდა ცნობილი სახალხო დამცველის მიერ გავრცელებული ინფორმაცია, რომლის თანახმადაც ნინოწმინდის ბავშვთა პანსიონთან დაკავშირებით გამოძიებაა დაწყებული:

"სახალხო დამცველის განცხადებიდან ჩვენთვისაც და საზოგადოებისთვისაც ახლახან ცნობილი გახდა, რომ ნინოწმინდის ბავშვთა სახლთან დაკავშირებით შინაგან საქმეთა სამინისტროში აღძრულია სისხლის სამართლის საქმეები.

მივმართავთ შსს-ს შესაბამის სამსახურს, გაასაჯაროვოს აღნიშნული საქმეები, რათა არავისთვის არაფერი იყოს დაფარული და ადგილი არ ჰქონდეს სხვადასხვა სპეკულაციას", - წერია საპატრიარქოს განცხადებაში.