აშშ-ის აერონავტიკის და კოსმოსური სივრცის კვლევის ეროვნული სამმართველო (NASA) ვენერაზე ორ ახალ მისიას აანონსებს. მათი მიზანია დადგინდეს, როგორ გახდა ვენერა "ჯოჯოხეთური სამყარო", თუ მას დედამიწის მსგავსი ბევრი მახასიათებელი აქვს. ინფორმაციას ამის შესახებ NASA ავრცელებს.

საუბარია მისიებზე DAVINCI+ და VERITAS.

DAVINCI+-ის დროს ვენერას ატმოსფეროს შემადგენლობა გაიზომება იმის გასაგებად, როგორ წარმოიქმნა და განვითარდა იგი და რატომ არის ის დედამიწის ატმოსფეროსთან შედარებით "უკონტროლო სათბური". გარდა ამისა, მისია დაადგენს, არსებობდა თუა არა ვენერაზე ოკეანე.

VERITAS-ის მიზანი კი პლანეტის გეოლოგიური ისტორიის შესწავლა იქნება.

თითოეულ მისიაზე NASA Discovery პროგრამის ფარგლებში დაახლოებით 500 მილიონი დოლარი გამოიყო და თითოეული მათგანი 2028-2030 წლებში დაიწყება.

ვენერა მეორე პლანეტაა მზიდან და მას ხშირად დედამიწის დობილს უწოდებენ, ვინაიდან ორივე ციური სხეული ერთმანეთს საკმაოდ ემსგავსება სიდიდითა და შემადგენლობით.

ვენერა დედამიწას ყველა სხვა პლანეტაზე მეტად უახლოვდება ხოლმე. ეძახიან ”ცისკრის ან მწუხრის ვარსკვლავს”, რადგან მისი დანახვა ხან დაისის შემდეგ შეიძლება, ხან განთიადის წინ. ვენერას თეთრი ღრუბლების სქელი ფენა ფარავს. ზედაპირზე ტემპერატურა 470 ºC-ს აღწევს.

ვენერას წელიწადი დედამიწის 7,5 თვის ტოლია. იგი თავისი ღერძის გარშემო პლანეტების უმეტესობასთან შედარებით პირუკუ ტრიალებს. მეცნიერები ამ მოვლენის მიზეზს დამაჯერებლად ვერ ხსნიან. ვენერას ღერძული ბრუნვა რეკორდულად ნელია - მისი პერიოდი დედამიწის 243 დღე-ღამეს უდრის.