18 წლის გოგონა, მარიამ ბიგიაშვილი ტაქსის მძღოლს სექსუალურ შევიწროებაში ადანაშაულებს.

გოგონას ტქმით, მგზავრობისას მძღოლი უცნობი გზით მიდიოდა და მასთან არასასურველი კომუნიკაციის დამყარებას ცდილობდა. შემთხვევა რამდენიმე დღის წინ მოხდა.

მომხდარზე თბილისის საქალაქო სასამართლოში პროცესი დღეს გაიმართა. მოსამართლემ 47 წლის კაცი სამართალდამრღვევად ცნო და ჯარიმა დააკისრა. საქმის მასალებში დევს აუდიო ჩანაწერიც, რომელიც მარიამ ბიგიაშვილმა მგზავრობისას ჩაიწერა.

დაზარალებული გოგონა ამბობს, რომ ტაქსის მძღოლი მას ფიზიკურადაც შეეხო.

"შემეშინდა იმიტომ, რომ მარტო, ღამის საათებში ვმგზავრობდი ტაქსით და ტაქსის მძღოლი ჩემი სხეულის ფორმებზე ძალიან ცუდად აპელირებდა. მომთხოვდა ჩემი ფეისბუქის და ინსტაგრამის კონტაქტები... ხელი გადმოწია და მუხლზე ამისვა, შემეძლო, რომ თავდაცვის კუთხით რაიმე ქმედება განმეხორციელებინა, მაგრამ იმდენად შეშინებული ვიყავი, რომ ვერც ვსაუბრობდი და მთლიანად სხეული მქონდა გაშეშებული", - ამბობს მარიამ ბიგიაშვილი.

საფარის იურისტის, თამთა ლუკავას თქმით, ახალგაზრდა ქალს ფსიქოლოგის დახმარება სჭირდება. ამასთან, არ გამორიცხავს, რომ დაზარალებულმა სასამართლოს მორალური ზიანის ანაზღაურების მოთხოვნით მიმართოს.

"მას ესაჭიროება ფსიქოლოგის დახმარება. ვფიქრობთ, რომ ამ საქმეზე მივმართოთ სასამართლოს და მოვითხოვოთ მორალური ზიანის ანაზღაურებაც", - ამბობს იურისტი.