გაფიცვას აგრძელებენ მინერალური წლყების სადისტრიბუციო კომპანიის მუშებიც - სს "მარგებელში" შემავალი კომპანია "ენგადის" მუშაობა ქუთაისსა და თბილისში პარალიზებულია. დისტრიბუტორთა პროტესტს საწყობის თანამშრომლებიც შეუერთდნენ და გაფიცულთა რაოდენობა 170-მდე გაიზარდა.

პარალელურად ისევ გრძელდება გაფიცვა ჩოხატაურის მუნიციპალიტეტის სოფელ ნაბეღლავში, სადაც კომპანია "წყალი მარგებელის" თანამშრომლები შრომის ანაზღაურების გაზრდასა და პირობების გაუმჯობესებას ითხოვენ.

"ამ ეტაპზე გაფიცულია წყალი მარგებელიას და ენგადის დასაქმებული 170 ადამიანი. პირველ ეტაპზე გაფიცვა დაიწყეს დისტრიბუტორებმა, მოთხოვნით, რომ გაიზარდოს ხელფასი და მოწესრიგდეს მათი ინდივიდუალური ხელშეკრულებები.

წლების განმავლობაში დამსაქმებელი მათ არ აძლევდა საშუალებას, რომ გამოეყენებინათ ბიულეტინი, შვებულება და სხვა ის პირობები, რაც გარანტირებული აქვთ დასაქმებულებს შრომის კოდექსით. ამ ეტაპზე, დამსაქმებელი უარს აცხადებს მოლაპარაკებებში ჩართვაზე და ამ მოლაპარაკებებში პროფკავშირის მონაწილეობაზე, რაც ასევე გარანტირებული უფლებაა დასაქმებულებისთვის.

მინისტრმა დაუყოვნებლივ უნდა გამოყოს მედიატორი და მხარეები მოლაპარაკების მაგიდასთან დასვას, ეს არის მექანიზმი, რომლის გამოყენებასაც ჩვენ სამინისტროს ვითხოვთ",- თქვა პროფკავშირების წარმომადგენლემა, ილია ლეჟავამ.

პროფკავშირების წარმომადგენლები სამინისტროსგან მედიატორის გამოყოფას მოითხოვს, რომელიც კომპანიასა და გაფიცულ თანამშრომლებს შუამავლობას გაუწევს.