მინსკში დააკავეს ბელარუსის ოპოზიციონერი ჟურნალისტი და ბლოგერი რომან პრატასევიჩი, რომელსაც ბელარუსის ხელისუფლება არეულობების მოწყობაში ადანაშაულებს. ტელეგრამ-არხ NEXTA-ს რედაქტორი პრატასევიჩი ლუკაშენკოს ხელისუფლებას პოლონეთში გაექცა და იქედან აგრძელებდა თავის საქმიანობას.

ჟურნალისტის დაკავების მიზნით, ბელორუსის ხელისუფლებამ, ათენიდან ვილნიუსის მიმართულებით მიმავალი ავიაკომპანია Ryanair-ის თვითმფრინავი, რომელშიც ოპოზიციონერი ჟურნალისტი იმყოფებოდა, ბორტზე ვითომდა ბომბის არსებობის მიზეზით, დაუგეგმავად, ფაქტობრივად იძულებით დასვა მინსკში და მგზავრების შემოწმების მიზეზით, პრატასევიჩი დააკავა. რა თქმა უნდა, თვითმფრინავში ბომბი არ აღმოჩნდა.

აღსანიშნავია, რომ თვითმფრინავში 12 ქვეყნის 171 მგზავრი იმყოფებოდა, მათ შორის საქართველოს ერთი მოქალაქე. მინსკიდან თვითმფრინავი ვილნიუსში გაფრინდა და მგზავრებს ლიეტუვას პრემიერი შეხვდა.

სკანდალურ დაკავებას უკვე მოჰყვა გამოხმაურება ევროპაში. ევროპელი პოლიტიკოსები მოითხოვენ მომხდარის დაუყოვნებლივ განხილვას, ბელორუსის საჰაერო სივრცის "სახიფათოდ" გამოცხადებას, ბელორუსის ავიაკომპანიების თვითმფრინავებისთვის ევროპის აეროპორტებში დაჯდომის აკრძალვასა და ლუკაშენკოს რეჟიმისთვის სერიოზული სანქციების დაწესებას.

ბელარუსის ოპოზიციის ლიდერი სვეტლანა ციხანოვსკაია გამოვიდა მოწოდებით, გაათავისუფლონ ჟურნალისტი და ინციდენტი გამოძიებულ იქნეს საჰაერო ტრანსპორტის საერთაშორისო ასოციაციაში. „დღეიდან ვერავინ, ვინც ბელარუსის თავზე გადაიფრენს, ვეღარ იგრძნობს თავს უსაფრთხოდ. საჭიროა საერთაშორისო რეაქცია,“ დაწერა მან.