საბერძნეთში, ათენის დასავლეთით უკვე მესამე დღეა ტყის მასივი იწვის.

საბერძნეთის სახანძრო სამსახურის ცნობით, ხანძარი 19 მაისს, საღამოს, კორინთიაში, ქალაქ ლუტრაკის მახლობლად მდებარე დასახლებაში გაჩნდა.

წინასწარი ინფორმაციით, ხანძრის მიზეზი მშრალ და ქარიან ამინდში ზეთისხილის ბაღებში ტოტების დაწვა გახდა.

ხანძრის ჩაქრობაში 278 მეხანძრე, 89 სახანძრო მანქანა და რამდენიმე ვერტმფრენი მონაწილეობს.

ადგილობრივი ხელისუფლების მონაცემებით, განადგურებულია 20 კვადრატულ კილომეტრზე მეტი ფართობის ფიჭვის ტყე. ხანძარმა ტყესთან მდებარე დასახლებამდე მიაღწია და რამდენიმე სახლი გადაწვა.