"ოცნებამ" გელათის სარესტავრაციო სამუშაოებს სრულად ჩამოაშორა იუნესკო

"ოცნებამ" გელათის სარესტავრაციო სამუშაოებს სრულად ჩამოაშორა იუნესკო - წიკლაური

საზოგადოება - 15:35, 21 May, 2021

1030

"ერთიანი ნაციონალური მოძრაობის" ერთ-ერთი ლიდერის ნუგზარ წიკლაურის განცხადებით, მმართველი გუნდის უპასუხისმგებლობის გამო ქართული და მსოფლიო კულტურული მემკვიდრეობის გამორჩეული ძეგლი ნადგურდება.
"ერთიან ნაციონალურ მოძრაობას აქვს თავის გეგმა და ასევე პარტია მოუწოდებს, ყველა ადამიანს, საქართველოს ყველა მოქალაქეს, რომ გადავდგათ ყვeლამ ერთად ნაბიჯები გელათის გადასარჩენად.
"ერის დაცემა იწყება მაშინ, როდესაც ის ივიწყებს თავის ისტორიას" - ვფიქრობ ილია ჭავჭავაძის ეს სიტყვები უკეთ გამოხატავს იმ დრამას, რომელიც მიმდინარეობს გელათში.
დანაშაულებრივი უპასუხისმგებლობის, უმეცრების, მმართველი გუნდის უპასუხისმგებლობის გამო ნადგურდება ქართული და მსოფლიო კულტურული მემკვიდრეობის გამორჩეული ძეგლი.
მინდა მოკლედ გითხრათ როდის დაიწყო გელათში სარესტავრაციო სამუშაოები და რამ მიგვიყვანა ამ მდგომარეობამდე - 2008 წლიდან 2012 წლამდე გელათში განხორციელდა გელათის აკადემიის, გაბრიელ ქიქოძის შენობების რესტავრაცია, აგრეთვე, აღმოსავლეთი კარიბჭის რესტავრაცია, წმინდა ნიკოლოზის ეკლესიის დახურვა და დავით აღმაშენებლის საფლავის კარიბჭის გადახურვა. ყველა ეს სამუშაოში, როგორც პროექტირების, ასევე უშუალოდ შესრულების დროს, მონაწილეობას იღებდნენ იუნესკოს წარმომადგენლები და საერთაშორისო ექსპერტები. შესაბამისად, არცერთი დღეს არ არის დაზიანებული.
2012 წელს ეს პროექტი შეჩერდა და აღდგა 2014 წელს უკვე ქართული ოცნების ხელისუფლების პირობებში. მას შემდეგ მთავარი განმასხვავებელი იყო ის, რომ მთლიანად ჩამოაშორეს სამუშაოებს იუნესკოს წარმომადგენლები და საერთაშორისო ექსპერტები. ჩამოაშორეს იმიტომ, რომ ჰქონიდათ დაუსჯელად ფულის მოპარვის შესაძლებლობა და სავალალო შედეგიც მივიღეთ" - აღნიშნა წიკლაურმა.
პარტიის პოლიტიკური საბჭოს წევრის, გიორგი იმედაშვილის განცხადებით კი ერთიანი ნაციონალური მოძრაობა, უკვე რამდენიმე თვეა საერთაშორისო ორგანიზაციებთან კავშირზეა და ცდილობს მათი ყურადღება მიიპყროს.
"ჩვენ ვცდილობთ, რომ ერთადერთი გზა, რომელიც დაგვრჩა გელათის გადასარჩენად გამოვიყენოთ, ჩავრთოთ საერთაშორისო ექსპერტები. მათ თქვან რა ხარისხის არის დაზიანება და როგორ უნდა მივხედოთ ძეგლს.
საერთაშორისო ორგანიზაციის ჩართულობის გარეშე ყველა ძეგლის რესტავრაცია არის დანაშაული. მოვუწოდებთ ქართულ საზოგადოებას რაც შეიძლება მეტმა საზოგადოებრივმა ჯგუფმა მიმართოს საერთაშორისო ორგანიზაციებს, რადგან ჩვენ აღარ დაგვრჩა უშუალოდ სხვა გზა, არც მონიტორინგის საშუალება გვაქვს" - აღნიშნა იმედაშვილმა.