თბილისის საქალაქო სასამართლოში შსს-სთან დაკავებული აქტივისტების პროცესზე მოწმედ დაკითხულმა სამართალდამცველებმა, რომლებიც დაკავებში უშუალო მონაწილეობას იღებდნენ, საქმეზე მტკიცებულებები ვერ მიიტანეს და განმარტეს, რომ დაკავებამდე ვითარებას მთავარი არხი იღებდა, სოციალურ ქსელში განთავსებულ ვიდეოში კი ჩანს ყველაფერი, თუმცა მისი ამოღება მთავარი არხის სერვერის გამო ვერ მოხერხდა.

ამის საპასუხოდ მთავარი არხის გენერალური დირექტორი ნიკა გვარამია შინაგან საქმეთა სამინისტროს სოციალურ ქსელში განთავსებული პოსტით პასუხობს, სადაც წერს, რომ უწყების მხრიდან ვიდეო მტკიცებულებაზე მოთხოვნა არ ყოფილა:

"შსს-მ დღეს საქალაქო სასამართლოში ვერ მიიტანა სამოქალაქო აქტივისტების მიერ სამართალდარღვევის ჩადენის მტკიცებულებები. ეს ყველაფერი ტრივიალური ამბავია, რომ არა პოლიციელის შემდეგი განცხადება:

მტკიცებულებები ვერ მოვიტანეთ, რადგან "მთავარი არხის" სერვერმა შეგიშალა ხელი.

შინაგან საქმეთა სამინისტრო / Ministry of Internal Affairs of Georgia რა სისულელეა ეს? ან რა "მთავარი არხი", ან რა სერვერი? ან "სერვერმა ხელი შეგვიშალა" საერთოდ რა შინაარსის მატარებელი ტექსტია? ამას გარდა, ინფორმაცია ამ შემთხვევის თაობაზე მთავარი არხისგან არავის არასდროს არ მოუთხოვია. არც მთავარი არხის სერვერისგან" - წერს გვარამია.