საპატრიარქოს პრესსამსახურის უფროსი ანდრია ჯაღმაიძე დღევანდელ პრესკონფერენციაზე დმანისში განვითარებულ მოვლენებს გამოეხმაურა და განაცხადა, რომ კონფლიქტის დიდ მასშტაბებში გადაზრდის მცდელობა გარედან იყო ინსპირირებული. ჯაღმაიძის თქმით, იმ დღეს მშვიდობისკენ გადაიდგა ნაბიჯი, რომელსაც გამყარება და წახალისება სჭირდება:

​"იმ გარემოებებიდან გამომდინარე, რაც ჩვენ იქ ვიხილეთ, ადგილზე რომ ჩავედით, დაველაპარაკეთ ხალხს, სრულიად ცხადი გახდა, რომ ამ კონფლიქტის უფრო დიდ მასშტაბში გადაზრდის მცდელობა გარედან იყო ინსპირირებული რაღაც ძალის მიერ. ძალიან სამწუხარო იქნება, თუ ჩვენ ვერ მოვახერხებთ, რომ დროულად აღვკვეთოთ ხოლმე მსგავსი ტენდენციები.

რა თქმა უნდა, ვერ დავასახელებ, ეს გამოვა ვარაუდები, რომელიც შეუფერებელია ახლა, რომ ვთქვა. ამ დასკვნას ვაკეთებთ იქიდან გამომდინარე, რომ თვითონ მოსახლეობაში განწყობა სრულიად შეუფერებელია იმ დაძაბულობისა, ვნებათაღელვისა, რაც ჩვენ ვიხილეთ.

შესაძლებელია გარკვეული მოსაზრებები გვქონდეს, მაგრამ ამის გაშლა მართებული არ იქნება, რადგან ამის დადასტურება შეუძლებელია.

იმ დღეს მშვიდობისკენ გადაიდგა ნაბიჯი, ჩვენთვის ეს ძალიან სასიხარულოა ამბავია. დღეს ყველა ვაცნობიერებთ, რომ ამ ნაბიჯს სჭირდება გამყარება, წახალისება, რომ საბოლოოდ მოხდეს აღმოფხვრა იმ საფუძვლებისა, რომლებზეც შესაძლოა მსგავსი უსიამოვნება მომხდარიყო.

კონფლიქტის დარეგულირებაში და შერიგებაში მონაწილეობდა სხვადასხვა მხარე, სახელმწიფო თავისთავად, მუფტი, ადგილობრივი სასულიერო პირები და მათ შორის საპატრიარქოც.

იქ იყვნენ ასაკოვანი ადამიანები, რომლებსაც გარკვეული ავტორიტეტი აქვთ მოსახლეობაში, მათი ჩართულობით ჩვენთან ერთად, პირველი ნაბიჯი გადაიდგა მშვიდობისკენ და მადლობა ეკუთვნის ყველას და მოურიდებლად შემიძლია ვთქვა, რომ საპატრიარქოს მათ შორის", - თქვა ჯაღმაიძემ.