თბილისში, პეკინის გამზირზე, საკუთარ სახლთან ახლოს, ორი კაცი არასრულწლოვან ტრანს გოგოს თავს დაესხა.

არსებული ინფორმაციით, არასრულწლოვანს სხეულზე დაზიანებები აქვს. გარდა ამისა, გოგოს დაუმტვრიეს ტელეფონი და მოპარეს ჩანთა და საფულე. ამის შემდეგ კი თავდამსხმელები ადგილიდან გაიქცნენ.

ტრანსგენდერი აქტივისტის, მადონა კიპაროიძის თქმით, თავდასხმა სიძულვილის მოტივით მოხდა - მისი თქმით, ტრანსგენდერ გოგოს უცხო პირები მაღაზიასთან საკმაო ხნის განმავლობაში ელოდებოდნენ, მაღაზიიდან გამოსვლის შემდეგ კი მას თავს დაესხნენ.

შინაგან საქმეთა სამინისტროს ინფორმაციით, ფაქტზე გამოძიება 126-ე მუხლით არის დაწყებული, რაც ძალადობას გულისხმობს.