მიზეზი, რომლის გამოც მადრიდის "რეალის" ერთერთმა წამყვანმა ფეხბურთელმა მარსელომ შესაძლოა “ჩელსისთან” ჩემპიონთა ლიგის ნახევრფინალის საპასუხო შეხვედრა გამოტოვოს, მეტად უცნაური და უპრეცედენტოა ამ დონის თამაშებს თუ გავითვალისწინებთ.
საქმე იმაშია, რომ ბრაზილიელი ფეხბურთელი, რომელიც ესპანეთის მოქალაქე 2011 წელს გახდა, 4 მაისს დანიშნული მადრიდის ასამბლეის არჩევნებზე, შემთხვევითობის პრინციპით, ერთერთ საარჩევნო უბანზე დამკვირვებლად არის მიწვეული.
როგორც ფეხბურთელმა, ასევე “რეალმა” აღნიშნული გადაწყვეტილება გაასაჩივრეს, თუმცა, მადრიდის საარჩევნო კომისიამ ჩემპიონთა ლიგის ნახევარფინალური დაპირისპირება არასაპატიო მიზეზად ჩათვალა.
როგორც მოგეხსენებათ, ლონდონში “ჩელსისა” და “რეალს” შორის მატჩი 5 მაისს გაიმართება, წინა დღით კი მარსელო ამ უცნაური მიზეზით მადრიდში უნდა იყოს. კომისია აცხადებს, რომ მარსელოს თამშის დღესაც შეუძლია ლონდონშi ჩასვლა, თუმცა ეს უკვე COVID-რეგულაციებს ეწინააღმდეგება.
კანონის თანახმად, ესპანეთის ყველა მოქალაქე, რომელიც საარჩევნო სიაშია რეგისტრირებული, ნებისმიერი დონის არჩევნებზე შესაძლოა გამოძახებულ იქნას არჩევნების დღეს, საარჩევნო უბანზე დამკვირვებლის მოვალეობის შესასრულებლად, რისთვისაც მას 65 ევროს გადაუხდიან. ამ მოვალეობიდან თავის არიდება მხოლოდ საპატიო მიზეზით შეიძლება.
ესპანეთში მსგავს სიტუაციებში 2019 წელს ლევანტეს გოლკიპერი აიტორ ერნანდესი და 2015 წელს ბილბაოს "ატლეტიკოს" ფეხბურთლი ინაკი ვილიამსიც აღმოჩენილან, ოღონდ აქ საქმე ეროვნული ჩემპიონატის ერთერთ მატჩს ეხებოდა და არა ამ დონის და თან გადამწყვეტ შეხვედრას.
სამეფო კლუბი ჯერ კიდევ არ კარგავს იმედს, რომ ფეხბურთელი საარჩევნო უბნის ნაცვლად მოედანზე აღმოჩნდეს.
მასალის გამოყენების პირობები