ხელვაჩაურის მერიის ადმინისტრაციის უფროსს, მირზა ბახტაძეს, ყოფილი ცოლი ფიზიკურ ანგარიშსწორებაში ადანაშაულებს. ოჯახში სავარაუდო ძალადობის ფაქტს პროკურატურა იძიებს. ინფორმაციას TV25 ავრცელებს.
სავარაუდო მოძალადე ამ დრომდე მუშაობს მუნიციპალიტეტში. მას გირაო აქვს შეფარდებული.
არსებული ინფორმაციით, მეუღლეზე ძალადობაში ბრალდებული კაცი ხელვაჩაურის მერის, ჯუმბერ ვარდმანიძის ნათესავია. ეს ფაქტი კი დაზარალებულის ადვოკატს იმის თქმის საფუძველს აძლევს, რომ მირზა ბახტაძეს გავლენიანი მაღალჩინოსნები მფარველობენ.
ბახტაძე ოჯახში ძალადობის ფაქტზე ბრალი 2021 წლის 11 მარტს წარუდგინეს, განმეორებითი ექსპერტიზის დასკვნის საფუძველზე კი მას ბრალი დაუმძიმდა. დაზარალებულის ადვოკატის მტკიცებით, მაღალჩინოსანმა მეუღლესა და ოჯახის სხვა წევრზე ფსიქოლოგიურად და ფიზიკურად რამდენჯერმე იძალადა.
პროკურატურის ინფორმაციით, ხელვაჩაურის მერიის მაღალჩინოსანს ბრალი სისხლის სამართლის კოდექსის 126-ე პრიმა მუხლით აქვს წარდგენილი, რაც ოჯახში ძალადობას გულისხმობს.
მასალის გამოყენების პირობები