ნამოხვანჰესის კაშხლის მშენებლობაზე 9-12 თვიანი მორატორიუმი გამოცხადდა

ნამოხვანჰესის კაშხლის მშენებლობაზე 9-12 თვიანი მორატორიუმი გამოცხადდა - მთავრობა

საზოგადოება - 11:12, 24 Apr, 2021

1210

ნამოხვანჰესის კაშხლის მშენებლობაზე 9-12 თვიანი მორატორიუმი გამოცხადდა - ამის შესახებ მთავრობა სპეციალურ განცხადებას ავრცელებს.

გავრცელებული განცხადების თანახმად, კომპანია ენკასთან დადებულ ხელშეკრულებას იუსტიციის სამინისტრო შეისწავლის საერთაშორისო იურიდიული კომპანიის საშუალებით.

"პრემიერმინისტრის დავალებით, კომპანია „ენკასთან“ დადებული ხელშეკრულების შესწავლა დაევალა იუსტიციის სამინისტროს. ამასთანავე, იუსტიციის სამინისტრო იქირავებს საერთაშორისო იურიდიულ კომპანიას, რომელიც შეისწავლის კონტრაქტის პირობების საერთაშორისო პრაქტიკასთან შესაბამისობას.

საქართველოს მთავრობის მოწვევით, არასამთავრობო სექტორთან მედიაციის პროცესში ჩაერთვება ევროკავშირის ენერგეტიკული გაერთიანების სრულუფლებიანი წარმომადგენელი. საერთაშორისო ექსპერტი „ნამახვანჰესის“ გარემოზე ზემოქმედების ეფექტის შესწავლის მიმართულებით იმუშავებს.

კაშხლის მშენებლობაზე გამოცხადდა მორატორიუმი 9-12 თვის ვადით, ვიდრე არ მოხდება გარემოსდაცვითი, გეოლოგიური და სეისმოლოგიური კვლევების რევიზია და ხელახალი დასაბუთება", - ვკითხულობთ განცხადებაში.

მთავრობის გადაწყვეტილებით, კომპანია ენკა ამ ეტაპზე პირველი ეტაპის მოსამზადებელ სამუშაოებს გააგრძელებს.

განცხადებაში, ასევე, ვკითხულობთ, რომ ნამახვანჰესის მიმდებარედ პოლიცია დამატებით ბარიერებს მოხსნის და პოლიციელთა რაოდენობასაც შეამცირებს.

"ნამახვანჰესის მიმდებარე ტერიტორიაზე პოლიცია მოხსნის დამატებით ბარიერებს და შეამცირებს ადგილზე მყოფი სამართალდამცველების რაოდენობას. ტერიტორიაზე დარჩება პოლიციელთა მხოლოდ ის რაოდენობა, რომელიც საჭირო იქნება ადგილზე არსებული უსაფრთხოების ვითარებიდან გამომდინარე.

საპროტესტო აქციის მონაწილეებს, პოლიციასთან კოორდინაციით, კანონის ფარგლებში პროტესტის თავისუფლად გამოხატვისთვის, აქციის გასამართად და კარვის გასაშლელად ადგილის შერჩევის შესაძლებლობა მიეცემათ", - ვკითხულობთ განცხადებაში.