ჟურნალისტმა ელისო კილაძემ სოციალურ ქსელში პოსტი გამოაქვეყნა, რომლითაც ის, ნებისმიერი სახის ძალადობას გაემიჯნა და ძალადობის მსხვერპლებს სოლიდარობა გამოუცხადა.

პარალელურად ჟურნალისტმა, ამავე პოსტის ქვემოთ, ძალადობაში ბრალდებულ გოგი წუალიას დაუჭირა მხარი და განაცხადა -"ძალადობა არა სტაფილო. ნარდის სათამაშოდ წამოყვა ქუთაისში?“

კილაძის, ამ კომენტარს უფელბადამცველი ბაია პატარაია გამოეხმაურა, ელისო კილაძის პოზიცია დაგმო და პოსტით უპასუხა:

"რასაც ელისო ამბობს ასმათზე არის სრული სიბნელე, უცოდინრობა და „გაუპატიურების კულტურის“ ნათელი მაგალითი. ელისო კილაძე გვასწავლის, რომ თუ არ გვინდა გაგვაუპატიურონ, მაშინ კაცს არ უნდა გავყვეთ ქალაქში ან ბინაში. ხოდა, გადაეცით ქალბატონ კილაძეს, რომ ქალს ყოველთვის, ვიმეორებ ყოველთვის(!), აქვს უფლება, უარი თქვას სექსზე და უარი უთხრას არა მხოლოდ გოგი წულაიას, არამედ საკუთარ ქმარს და შეყვარებულს! და ყველა კაცი, რომელიც ამ უარს არ მიიღებს და ძალით ეცდება გაუპატიურებას, არის მოძალადე და კრიმინალი!

ეს არის არა მხოლოდ სისხლის სამართლის კოდექსის ანი-ბანი, არამედ ადამიანობის და მორალის ანი-ბანიცაა.

აუცილებლად მოვამზადებთ განცხადებას წულაიას საქმეზე იურიდიული არგუმენტაციით, რომ ასეთი გამოხტომები შეწყდეს ასმათის მიმართ. რაც არ უნდა ამოუქექოს ელისო კილაძემ ასმათს, ფაქტია და ვიდეო ჩანაწერებში, რომელიც არსებობს და რომელიც მინახავს ჩემი თვალით, წულაია აღიარებს, რომ ფეხებზე დაიკიდა ასმათის არაერთხელ თქმული უარი, ფიზიკურად ეძალადა მას, უფათურებდა ხელებს და ცდილობდა გაეკავებინა ქალი მანამ, სანამ ასმათმა არ მოიგერია მთელი ძალით, ხელებით, ფეხებით, კბილებით... გოგი წულაიამ ვერ გააუპატიურა ასმათი. თუმცა, ნამდვილად სცადა, და შეძლო სხვაგვარი ძალადობრივი სექსუალური ქმედებების განხორციელება. ეს კაცი ტყუილად არ ზის ციხეში!

ერთადერთი პრობლემა ისაა, რომ ამ ქვეყანაში სამართალი სანახევროდ ფუნქციონირებს და ის თუ კარგად მუშაობს წულაიას წინააღმდეგ, ცუდად მუშაობს ჯიშკარიანის წინააღმდეგ, მაგრამ არც ჯიშკარიანს შერჩება რამე, ბოლომდე ვიბრძოლებთ და ბოლომდე მივყვებით. სასამართლო პროცესები განახლებულია პანდემიის მერე. დღეს ზუსტად გვაქვს მორიგი პროცესი“, - წერს პატარაია.