ისრაელის სახელმწიფოსა და საქართველოს მთავრობას შორის დადებული შეთანხმების თანახმად, საქართველოს მოქალაქეები ისრაელის სახელმწიფოში ხანგრძლივი მოვლის დაწესებულებებში დამხმარე მუშაკის პოზიციაზე დასაქმებას შეძლებენ. რაც შეეხება სამუშაო ადგილების კვოტას - 2021 წლის განმავლობაში დაგეგმილია საქართველოს 1000 მოქალაქის ისრაელში დასაქმება. თუმცა ამ დროისთვის დასაქმების სურვილი 1132 ადამიანმა გამოთქვა.

დასაქმების მსურველი მინიმუმ საშუალო სკოლადამთავრებული უნდა იყოს. ასევე, უნდა ჰქონდეს სახელმწიფოს მიერ აღიარებული "სახლის პირობებში გასაწევი სამედიცინო დახმარება/მოვლის" ტრენინგის გავლის დამადასტურებელი დიპლომი/სერტიფიკატი, ან ექთნის/ექთნის თანაშემწის დიპლომი.

დასაქმების მსურველი ინგლისურს და/ან რუსულ ენას საკომუნიკაციო დონეზე უნდა ფლობდეს. ასევე, უნდა იყოს საქართველოს მოქალაქე. რაც შეეხება ასაკს - 25-დან 45 წლამდე განისაზღვრა.