იაპონიის მმართველი „ლიბერალ დემოკრატიული პარტიის“ გენერალური მდივანი, ტოშიჰირო ნიკაი ტოკიოს ოლიმპიური თამაშების გადადებას არ გამორიცხავს, თუკი ქვეყანაში ეპიდემიოლოგიური ვითარება საგრძნობლად გაუარესდება.

„სიტუაცია თითოეულ ეტაპზე უნდა გავაანალიზოთ. თუ რაღაც მომენტში ეს შეუძლებლად მიგვაჩნია, უბრალოდ აუცილებელი გადაწყვეტილება უნდა მივიღოთ. თუკი ოლიმპიადის ჩატარება შეუძლებელი იქნება, ის უნდა გაუქმდეს“, - აღნიშნა ტოშიჰირო ნიკაიმ.

გასულ წელს იაპონიამ და საერთაშორისო ოლიმპიურმა კომიტეტმა მიიღეს გადაწყვეტილება, რომ ტოკიოს 2020 წლის ოლიმპიადა ერთი წლით გადაიწევდა და იგი 2021 წლის 23 ივლისს უნდა ჩატარებულიყო, ხოლო მარტის ბოლოს იაპონიის მთავრობა ტოკიოს ოლიმპიადის უცხოელი მაყურებლების გარეშე ჩატარების საკითხს განიხილავდა.