"ორსულად ვიყავი, როცა პირველად მცემა, დაიწყო დილის 4-ზე ჩემი ცემა და არ გაჩერდა 8-მდე...15 წუთი მქონდა სახლიდან გამოსაქცევად, 6 ჩანთა და ბავშვი მოვიკიდე და გამოვიქეცი" - ნინუცა მაყაშვილი ოჯახურ ძალადობაზე 11 წლის შემდეგ პირველად ალაპარაკდა

სოც.მედია - 11:21, 13 Apr, 2021

12037

ნინუცა მაყაშვილი ყოფილი მეუღლის, ბესო ზანგურის მხრიდან ოჯახურ ძალადობაზე 11 წლის შემდეგ პირველად ალაპარაკდა.
"ახლა დიდი დრო გავიდა და მემარტივება ამაზე საუბარი, რადგან გადავლახე… არ მახსოვს როდის იძალადა პირველად, თუმცა მახსოვს რომ ორსულად ვიყავი. არასდროს ვსაუბრობდი ამ თემაზე, ძალიან მეშინოდა. ბევრჯერ მომხდარა ასეთი ამბავი. მაგალითად, ის, რომ დროზე არ გავრეცხავდი დანა-ჩანგალს, ან შუქნიშანზე მოწყენილი მოვეჩვნებოდი, ან სხვა ბიჭს დაინახავდა. მარტივია ხელი დაარტყა იმას, ვინც სუსტია. მეშინოდა და ვპატიობდი. იყო მუქარები, რომ ჩემი ოჯახის წევრებს დაემუქრებოდა. ვერავის ვუყვებოდი. ყველა ელოდებოდა ჩემგან, რომ ვიტყოდი, მიშველეთ-მეთქი. ბოლოს ვთქვი. გასტროლებზე იყო წასული, მე ბებიასთან ვიყავი ბავშვთან ერთად, ვთხოვე, იქ დავრჩები-მეთქი. სახლში რომ დავბრუნდი და დაიწყო ღამის ოთხ საათზე, დილამდე არ გაჩერდა…”, – აღნიშნა ნინუცამ "ფარულ კონვერტში"
მისივე თქმით, "იმ თეთრი თვალების ყურება შვილმა გააძლებინა და იცოდა, რომ მისგანთავი უნდა დაეღწია".მსახიობი იხსენებს ძალიან მძიმე ემოციურ მომენტს, როცა ის სახლიდან გამოიქცა 6 ჩანთითა და ბავშვით ხელში.