"გვებრძვიან, მაგრამ იმასაც ნუ დავივიწყებთ, რომ ვენ ვართ მებრძოლი ეკლესია. ჩვენში წმინდანი ჯერჯერობით არავინ არ არის. ყველა ვიბრძვით იმისთვის, რომ დავიმკვიდროთ ღვთის სასუფეველი" , - განაცხადა მეუფე იაკობმა საკვირაო ქადაგებაზე.

მეუფე იაკობი ეკლესიის მტრებზე, მოღალატეებზე და პატრიარქის წინააღმდეგ ბრძოლაზე საუბრობს და ამბობს, რომ "შინაური თუ გარეული" ცდილობს ეკლესიას ჩამოაშოროს ხალხი - მისივე თქმით, "ეკლესიას იმიტომ ებრძვიან, რომ ადვილად დაშალონ საქართველო, დავალება აქვთ".

ბოდბელმა ეპისკოპოსმა დღეს ყველას, განსაკუთრებით კი სასულიერო პირებს სინანულისკენ მოუწოდა:

"წლები გადის და არათუ სინანული, არამედ გამოდიან და სულელებივით ერთი და იგივე რამეს იძახიან. ნეტა თვითონ თუ სჯერათ, მაგრამ იმდენჯერ ლაპარაკობენ, შეიძლება თვითონ ერთმანეთი დააჯერეს. საეკლესიო კანონებიც არის და თვითონ მატყუარებს იგივე კანონით განაკანონებენ, სანამ სასამართლო დაიწყება მაგ იმაზე ხელს აწერს, რომ რაც ბრალი შეაქვს ადამიანზე, თუ ვერ დაუმტკიცა, თვითონ იმ ბრალით განისჯება. ამიტომ ყველა ფრთხილად უნდა იყოს და რა გაუკეთებია ცხოვრებაში ისეთი, რომ პატრიარქს ებრძვიან.

ეს ორაზროვანი ლაპარაკები, ვისგანაც არ უნდა მოდიოდეს დაფიქრდნენ და აირჩიონ, სად დგანან, ღმერთთან დგანან, თუ მატყუარებთან დგანან. უკომპრომისოები ვიქნებით, მერე უკვე ავტორიტეტიც აღარ არსებობს მასე რომ იქცევიან და ყველას მიეხედება აბსოლუტურად. ერთობა ვიცი ნამდვილი ერთობა, ძალად ერთობა არ გამიგია.

3 კვირაც და აღდგომის სიხარული უნდა ვიგრძნოთ, მაგრამ როდესაც ჩვენი ძმები ასე მძიმედ იქცევიან, როგორ უნდა მქონდეს. სულ ტკივილით და ტკივილით მივდივართ ჩვენი ცოდვები არ გვეყოფა, რომ გარეთ ამას ვუყუროთ ეკლესიის დასანგრევად როგორ მოუწოდებენ და ბოროტ ძალებს როგორ ემორჩილებიან?!...ეკლესიას იმიტომ ებრძვიან, რომ ადვილად დაშალონ საქართველო, დავალება აქვთ. ",-თქვა მეუფე იაკობმა.