მდინარე ენგურში დაღუპული თამაზ ბასლანძის ცხედარი უკვე გალში გადაასვენეს. ცხედრის გადასვენებასთან დაკავშირებით დილიდან შეფერხება იყო, რადგან რუსმა ოკუპანტებმა გარდაცვალების რუსულად დამოწმებული ცნობა მოითხოვეს, რის გამოც პროცესი გაჭიანურდა.

ოთხი დაღუპული პირიდან ერთ-ერთის გადასვენება გუშინვე მოხერხდა, ხვალ კი ორ მათგანს გადაასვენებენ.

შეგახსენებთ, რომ გუშინ მდინარე ენგურში საქართველოს ოთხი მოქალაქის ცხედარი იპოვნეს. ისინი სასაზღვრო პუნქტის გვერდის ავლით ცდილობდნენ საქართველოს მიერ კონტროლირებად ტერიტორიაზე გადმოსვლას, რადგან პენსიის აღება და სასურსათო პროდუქტის შეძენა სურდათ, ენგურის ხიდის გავლით კი იძულებულები გახდებოდნენ ხუთდღიან კარანტინში ყოფილიყვნენ.