დედამიწის შემსწავლელ მეცნიერებათა ინსტიტუტისა და სეისმოლოგიის ეროვნული ცენტრის დირექტორის თეა გოდოლაძის განცხადებით, ცენტრი ვაშლიჯვრის ტერიტორიაზე არსებულ მეწყერზე დაკვირვებას აღარ აწარმოებს. როგორც გოდოლაძემ "პალიტრანიუსის" გადაცემა "პოლიტნიუსში" განმარტა, კომპანიამ, რომელიც თბილისის მერიამ დაიქირავა სეისმოლოგიის ეროვნული ცენტრი ტერიტორიიდან ფაქტობრივად გააგდო:

"მონიტორინგის სისტემა, რაც გვქონდა დამონტაჟებული და რითაც დავდეთ კვლევა, იმ კომპანიამ, რომელმაც იქ მუშაობა დაიწყო, გაგვინადგურა. ჩვენ მზად ვიყავით ნებისმიერი სახის თანამშრომლობისთვის, მაგრამ როცა იქ ავედით, ყველაფერი რაც კი გავაკეთეთ, განადგურებული დაგვხვდა. იმისთვის, რომ არ დაგვზიანებოდა ძვირადღირებული აპარატურა, სასწრაფოდ მოვხსენით მეწყრიდან. როცა ვიკითხეთ, რატომ გააკეთა ეს კომპანიამ - აღმოჩნდა, რომ ეს გადაწყვეტილება დამოუკიდებლად მიიღეს, აბსოლუტურად არ იყვნენ კოორდინაციაში. ჩვენ გვეგონა, რომ ერთობლივად მოვახდენდით მუშაობას, ერთად ავაწყობდით მონიტორინგის სისტემას - თურმე ეს ასე არ არის. თურმე მერიას უკვე გადაწყვეტილი ჰქონდა, რომ კომპანიას დამოუკიდებლად უნდა გაეკეთებინა მონიტორინგი. პირდაპირ ვერ გვითხრეს წადითო, მაგრამ გაგვაგებინეს, ახლა ჩვენ ვართ და თქვენ გაჩერდითო.

ყველა წერტილი მოშალეს, საიდანაც ვაკვირდებოდით მოძრაობას, მეწყრის სახე წაიშალა, რეალურად იქ ადგილზე აღარაფერია, რაზეც დაკვირვება მოხდება. ახლა არსებული მონიტორინგი არასაკმარისია. როცა კომპანიას ვთხოვეთ წარმოედგინათ ნახაზი, დასკვნა, თუ რის საფუძველზე მიიღეს გადაწყვეტილება, მსგავსი სამუშაოების შესრულების ფაქტობრივად ერთ ფურცელიც ვერ გვანახეს. ვკითხეთ თუ რა იდო რაპორტში, რა სახის რეკომენდაციები გასცა გერმანულმა მხარემ - ამაზე გვიპასუხეს, რომ „ზუმ ქოლით“ აქვთ კოორდინაცია. რეალურად „ზუმ ქოლის“ სპეციალისტების იმედად ვართ დარჩენილები. რაც შეეხება მერიას, მერიასთან არანაირი კომუნიკაცია ამ ეტაპზე არ გვაქვს, მივედით და რეალურად გამოგვაგდეს, არ გვჭირდებითო, ჩვენც წამოვედით, რა უნდა გვექნა“, - განაცხადა თეა გოდოლაძემ.