სოფელ რიონში ძმები ავთანდილ და ალექსანდრე მამრიკიშვილები ცეცხლსასროლი იარაღიდან გასროლით მოკლეს. ადგილობრივების ინფორმაციით, მკვლელობაში სავარაუდო დამნაშავე მათივე ბიძაშვილი, ღუტუშა მამრიკიშვილია. გავრცელებული ინფორმაციით, ორი დღის წინ მათ ერთმანეთში კონფლიქტი მოუვიდათ და მოგვიანებით ბიძაშვილმა ძმებს იარაღიდან ესროლა. მომხდარის შემდეგ, დამნაშავე შემთხვევის ადგილიდან მიიმალა, თუმცა პოლიციამ ის მალევე, მომხდარიდან რამდენიმე საათში დააკავა. მას ბრალად დამამძიმებელ გარემოებაში ჩადენილი 2 პირის განზრახ მკვლელობა ედება. დანაშაული 16-დან 20 წლამდე ან უვადო თავისუფლების აღკვეთას ითვალისწინებს.

"მოკლულები 35 და 36 წლის ბიჭები არიან. მკვლელობაში ბრალდებული მათი ბიძაშვილი ღუტუშა მამრიკიშვილია, დაახლოებით 30 წლამდე ასაკისაა. მკვლელი ნასვამი ყოფილა. როგორც ვიცი, დაოჯახებულია, ორი პატარა შვილი ჰყავს. მოკლული ძმები დაოჯახებულები არ არიან, მამიდასთან ერთად ცხოვრობდნენ, მშობლები გარდაცვლილი ჰყავთ. მომხდარის რეალური მიზეზი არ ვიცით. ბიჭები ეზოში მუშაობდნენ, თურმე ერთი ძმა ეზოს გარეთ ყოფილა მეორე ეზოში იყო და ორივეს ესროლა.

არასოდეს ყოფილან კონფლიქტურები, მშრომელი ბიჭები იყვნენ. მკვლელობაში ბრალდებულიც მუშაობდა. ჩვენს სოფელში წყალი შემოჰყავთ და რამდენიმე ხნის წინ დამიკავშირდა, თუ შეიძლება ორი სიტყვა შემაწიე, რომ მუშაობა დავიწყოო, ვესაუბრე კიდეც, ვისაც ეს საკითხი ეხებოდა და დაიწყო კიდეც იქ მუშაობა. მერე, როგორც გავიგე, ფეხი უტკენია და თავი დაანება.

ღუტუშას მამა გარდაცვლილი ჰყავს, დედა საზღვარგარეთ არის. როგორც ადგილობრივები ამბობენ, ძალიან ნასვამი ყოფილა. რა მოხდა, არ ვიცით, სოფელში ფიზიკურად შრომობდნენ. მომხდარით ყველანი შეძრულნი ვართ", - განაცხადა გამგებლის წარმომადგენელმა სოფელ რიონში გიორგი ელბაქიძემ.

წყარო: კვირის პალიტრა