კობახიძის პოსტი ანტივაჟაზე, ქართულმა ოცნებამ დაასპონსორა

სოც.მედია - 10:56, 02 Apr, 2021

1650

ქართული ოცნების თავმჯდომარის, ირაკლი კობახიძის ფეისბუქ პოსტი, სადაც ის აღნიშნავს, რომ ნაციონალი თავისი არსით ანტივაჟაა, დაასპონსორეს. თანხას კი, პარტია ქართული ოცნება იხდის.
კობახიძე რუსი ჟურნალისტის, ვლადიმერ პოზნერის საქართველოში ჩამოსვლის შემდეგ განვითარებულ მოვლენებს გამოეხმაურა პოსტით, სადაც სტუმარ-მასპინძლობაზეც ისაუბრა.
"გუშინ და დღეს ნაციონალები ამტკიცებდნენ, რომ ქართული წესი — "დღეს სტუმარია ეგ ჩემი" ვრცელდება მხოლოდ მოყვარეზე და არა მტერზე. შეგახსენებთ, რომ ვაჟას ეს ანდერძი გრძელდება სიტყვებით — "თუნდ ზღვა ემართოს სისხლისა". ანუ წესის ობიექტი სწორედ რომ მტერია, თორემ მოყვარეს კაცი რომ მოყვრულად ხვდება, ამას გულზე მჯიღის ცემა საერთოდ არ ჭირდება. აქ პრობლემა უფრო მეტად მენტალიტეტშია, ვიდრე არცოდნაში. ნაციონალი ვერ იტანს ვაჟას, ისევე როგორც ყველაფერ წმინდას, რაც ჩვენს ტრადიციებსა და ღირსებას უკავშირდება. დარწმუნებული ვარ, ადამიანი, რომელსაც ვაჟა წაკითხული და გაგებული აქვს, ნაციონალი ვერასდროს გახდება. სხვანაირად რომ ვთქვათ, ნაციონალი, თავისი არსით, არის ანტივაჟა.
ამ დასკვნას ამყარებს ელენე ხოშტარიას კიდევ ერთი გუშინდელი გამონათქვამი — ინფორმაცია პოზნერის გეგმების შესახებ მისი მასპინძლისგან მქონდაო. ეს მართლა რუსეთის საერთაშორისო უსაფრთხოების სპეციალისტი და უმაღლესი ალბათობით, ეფესბეს აგენტი ყველას გასაგონად ამბობს, რომ ქართველი სტუმრის დამბეზღებელია, ანუ ქართველს აბრალებს იმას, რაც არის თავად, ნაციონალი — ანტივაჟა. ესენი არიან ადამიანები, რომლებსაც ხელში უჭირავთ რუსული ასანთი და ქვეყანას მუდმივად პრობლემებით ემუქრებიან. მათი გუშინდელი ფსევდოპატრიოტული ფსევდოპროტესტიც ამის კიდევ ერთი ნათელი დასტური იყო" - წერს კობახიძე ფეისბუქში.