“ბოლო კვირებში სხვა, ე.წ. გაციების ვირუსებიც ცირკულირებს, მათ შორის აღსანიშნავია, რომ კოვიდ-19-ის გარდა, ჩვეულებრივი კორონავირუსებიც არის” – ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილემ ისაუბრა. მან აღნიშნა, რომ ეს ვირუსები გაციებას იწვევს და ჩვეულებრივ მიმდინარეობს.

როგორც დაავადებათა კონტროლის ცენტრში გამართულ ბრიფინგზე, ცოტა ხნის წინ, პაატა იმნაძემ აღნიშნა, იმისათვის, რომ ეს ვირუსები კოვიდ-19-სგან გავარჩიოთ, ერთადერთი გზა კორონავირუსზე ტესტის გაკეთებაა:

“ქვეყანაში სხვა ტიპის ვირუსებთან დაკავშირებით, მონიტორინგი ყოველკვირეულად მიმდინარეობს. ბოლო კვირებში სხვა ე.წ. გაციების ვირუსებიც ცირკულირებენ, მათ შორის აღსანიშნავია, რომ ამ კოვიდის გარდა, ჩვეულებრივი კორონავირუსებიცაა, რომლებიც გაციებას იწვევს და ჩვეულებრივად მიმდინარეობს. გარდა ამისა, გარკვეული ადენოვირუსებიც, რინოვირუსებიც არის, ძირითადად სურდოს რომ იწვევენ. ამის გარჩევის ერთადერთი გზა არის ის, რომ თუ ადამიანს აქვს ტემპერატურა და რაიმე სიმპტომი, პირველ რიგში, ჩაიტაროს კორონავირუსზე ტესტი.” – თქვა იმნაძემ.