საქართველოს გაერთიანებული სამელიორაიციო სისტემების კომპანია ზემო  სამგორის სარწყავი სისტემის სათავე ნაგებობის თბილისის წყალსაცავზე, ქვემო მაგისტრალური და გამანაწილებელი არხის, ასევე II რიგის გამანაწილებლების რეაბილიტაციას ახორციელებს. სარეაბილიტაციო სამუშოებს ტენდერში გამარჯვებული  კომპანია შპს „კალასი“ ასრულებს.

პროექტის ღირებულებაა 9 497 013 ათასი ლარი. დღეისათვის უკვე შესრულებულია 403 662 ლარის ღირებულების სამუშოები. ამ ეტაპზე,  დაახლოებით 3 ათასი ჰა მიწის სავარგულის მორწყვაა შესაძლებელი. სარეაბილიტაციო სამუშაოები 2013 წლის 13 სექტემბერს დაიწყო და მომავალი წლის შემოდგომაზე დასრულდება.

,,სარეაბილიტაციო სამუშაოების დასრულების შემდეგ, წყალუზრუნველყოფილი იქნება გარდაბნის მუნიციპალიტეტის  სოფლების -  გამარჯვების, ნორიოს, მარტყოფის, ახალსოფელის, ლემშვენიერას, ნაგების,  ვაზიანის, სართიჭალის, ლილოს დასახლების  8 ათასი  ჰა სასოფლო-სამეურნეო მიწის ფართობი.  მოქმედ გამანაწილებლებთან ერთად, აღდგება  ისეთი გამანაწილებლებიც, რომელიც 15-20 წელია არ ფუნქციონირებს“, - განაცხადა შალვა ფიფიამ. 

                                ამჟამად საქართველოს მასშტაბით სარწყავი სისტემების პრაქტიკულად ყველა დიდი მაგისტრალური არხი და გამანაწილებელი გაწმენდილია. ბოლო 20 – 25 წელია მსგავსი მასშტაბის სარეაბილიტაციო სამუშაოები არ ჩატარებულა.  აღნიშნული ღონისძიებების  შედეგად საქართველოში წყალუზრუნველყოფილია  68.2 ათასი ჰა სავარგული. სულ გაიწმინდა  და  მოწესრიგდა  1077.5 კმ საირიგაციო არხი.                   

საერთო ჯამში შარშანდელთან შედარებით წელს, წლის ბოლომდე  სამჯერ მეტი ფართობი  გასარწყავდება.

სარწყავი და დამშრობი სისტემების რეაბილიტაციის განხორციელება საშუალებას მისცემს ფერმერებს გაზარდონ სასოფლო-სამეურნეო პროდუქციის წარმოება 40-50%-ით, შეიქმნება მოსავლის სტაბილურად მიღების შესაძლებლობა, მინიმუმამდე იქნება დაყვანილი ბუნებრივ-კლიმატური პირობებით გამოწვეული უარყოფითი პროცესების გავლენა.