დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, მიმდინარე წლის ივლისიდან, სავარაუდოდ, ქვეყანაში მასობრივი ინუმიზაცია დაიწყება. მისი თქმით, კორონავირუსის ვაქცინებთან დაკავშირებული საინფორმაციო კამპანია თანდათან კიდევ უფრო გაძლიერდება.

გამყრელიძის განმარტებით, ვაქცინაციის მსურველთა რაოდენობა გაიზარდა, თუმცა, ეს საკმარისი მაინც არ არის:

„დღეს უკვე იცით, რომ ქვეყანაში „ფაიზერით“ აცრა დაიწყო. დილის მონაცემებით, ქვეყნის 6 კლინიკაში საკმაოდ კარგი მონაცემები გვაქვს, ადამიანები აქტიურობენ. გუშინ უკვე „ასტრაზენეკაზე“ ამცრელთა რაოდენობა გაიზარდა. მაგალითად, თუ გუშინწინ სულ 70 იყო, გუშინ 700-ზე მეტი აცრილთა რაოდენობა იყო, მაგრამ ეს ძალიან ცოტაა. დღეში სულ მცირე, 3 ათასი უნდა გვქონდეს ამ ეტაპზე, მარტ-აპრილ-მაისში, რომ ჩვენ ქვეყანაში ე.წ. საზოგადოებრივი იმუნიტეტი შევქმნათ. თანდათან მეტი ვაქცინა შემოვა. მეტი აქტიურობა გვინდა იმიტომ, რომ პანდემიის დასრულების გზა ვაქცინაციაზე გადის.

დღეს ქვეყნის 6 კლინიკაში, თბილისში ოთხ და თითო-თითო კლინიკაში ბათუმსა და ქუთაისში „ფაიზერით“ აცრები დაიწყო. გრძელდება „ასტარზენეკაზეც“ აცრა, უფრო და უფრო აქტიურდება, მეტი მოწოდება და აქტიურობა გვჭირდება, რომ ვაქცინაცია მაქსიმალურად გაფართოვდეს.

იქნება არამარტო ჩინეთის წარმოების ვაქცინა. ჩვენ ე.წ. მასობრივ იმუნიზაციაზე გადავალთ დიდი ალბათობით, ივლისიდან. მიმდინარეობს პირდაპირი მოლაპარაკებები. გუშინ მოვიდა კონტრაქტი მეორე ვაქცინაზე, ეს არის „ნოვავაქსის“ ვაქცინა, რომელთანაც უკვე დაახლოებით ორი თვეა მიმდინარეობს მოლაპარაკებები. ეს არის ამერიკული კომპანია და მის მიერ წარმოებული ვაქცინა განსხვავდება პრინციპით დღეს არსებული „ასტრაზენეკას“ „მოდერნას“ „ფაიზერის“ ან ჩინურის ვაქცინისგან, ცოტა სხვა პრინციპზეა დამყარებული მისი წარმოება. „ნოვავაქსი“ არის ვაქცინების უდიდესი მწარმოებელი მსოფლიოში. ჩვენ გარდა „კოვაქსისა“, პირდაპირი მოლაპარაკება გვაქვს „სერუმ ინსტიტუტთან“ და ახლა მიმდინარეობს საუბარი დაახლოებთ მილიონი დოზა „ნოვავაქსის“ შესყიდვაზე. გარდა ამისა, ქვეყანა აწარმოებს პირდაპირ მოლაპარაკებებს „ფაიზერთან“, არა „კოვაქსის“ გავლით, არამედ პირდაპირ „ფაიზერის“ შესყიდვასთან დაკავშირებით. ველოდებით „ფაიზერისგან“ მოწოდების პირობებს და ასევე, მიმდინარეობს მოლაპარაკებები „ჯონსონ & ჯონსონთან“. ამ წლის განმავლობაში სხვადასხვა ვაქცინები გამოჩნდება ქვეყანაში.

კოვიდვაქცინებს, განსხვავებით რუტინული ანუ კალენდარული ვაქცინებისგან, მეტი აქვთ გვერდითი მოვლენების ალბათობა. მხედველობაში მაქვს ტემპერატურის მომატება, კუნთების ტკივილი, სახსრების ტკივილი და ა.შ. ამიტომ, ისინი ტარდება ჰიოსპიტალურ დაწსებულებებში და ეს გაფართოვდება ყველა ჰოსპიტალში. ქვეყანაში არის დაახლოებით 200-ზე მეტი ჰოსპიტალი. გარდა ამისა, ივლისიდან გვინდა, რომ დიდ ქალაქებში, როგორიცაა თბილისი, ბათუმი, ქუთაისი, რუსთავი, შეიქმნას მასობრივი აცრების ცენტრები, რომელთა გამტარუნარიანობა დღიურად იქნება 3000-4000 აცრა. ეს შესაძლებელი გახდება, როდესაც ქვეყანაში შესაბამისი მარაგები გვექნება“, - განაცხადა გამყრელიძემ.