შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა ბრიფინგზე საქართველოს ოკუპირებულ ტერიტორიაზე მცხოვრები მედიკოსებისა და ასაკობრივი ჯგუფების ვაქცინაციის შესახებ ისაუბრა და განაცხადა, რომ მსურველებს ვაქცინის გაკეთება საქართველოს ცენტრალური ხელისუფლების კონტროლირებად ტერიტორიაზე შეეძლებათ:

„მოწოდებული დოზების პარალელურად ჯერ ხდება პრიორიტეტული ჯგუფების უზრუნველყოფა, რაც შემდეგ გავრცელდება სხვა მოქალაქეებზეც. დღეს ჩვენ გვაქვს შესაძლებლობა გაცნობოთ, რომ საქართველოში მიმდინარე კოვიდსაწინააღმდეგო იმუნიზაციის პროგრამაში ჩართვის საშუალება ეძლევათ საქართველოს აფხაზეთის და ცხინვალის რეგიონში მცხოვრებ სამედიცინო სფეროს და შესაბამისი ასაკობრივი ჯგუფის წარმომადგენელ პირებს, რომელთაც შეეძლებათ ვაქცინაცია ჩაიტარონ საქართველოს ცენტრალური ხელისუფლების კონტროლირებად ტერიტორიაზე. ამ პროცესთან დაკავშირებული პროცედურები და სქემა სხვა შესაბამის უწყებებთან თანამშრომლობით განსაზღვრულია საქართველოს ჯანდაცვის სამინისტროს მიერ, რომელიც კომპეტენციის მიხედვით გაავრცელებს აღნიშნულ ინფორმაციას. როგორც მოგეხსენებათ, საქართველოს უწყებათაშორისი საკოორდინაციო საბჭო ეპიდემიის მართვის პროცესში შესაბამისი რეგულაციების დაწესებაზე თუ გაუქმებაზე ეტაპობრივად, თანმიმდევრულად და პრაგმატულად იღებს გადაწყვეტილებებს. სწორედ ამ მიდგომით ვაგრძელებთ ჩვენ მუშაობას დღესდღეობით ოკუპირებულ რეგიონებთან დაწესებულ დროებით ზომებთან მიმართებაშიც“, - განაცხადა ახვლედიანმა.