27 წლის ექთნის მეგი ბაქრაძის გარდაცვალებაზე ექსპერტიზის პასუხი დღეს გახდება ცნობილი. ოჯახის ადვოკატის ნინო ამაღლობელის განცხადებით, ექსპერტიზის დასკვნას ელოდებიან როგორც სამხარაულის ექსპერტიზის ნიუროდან, სადაც აუტოფსია ჩატარდა, ასევე ლუგარის ლაბორატორიიდან, სადაც დადგინდება, ჰქონდა თუ არა გარდაცვლი ექთანს კორონავირუსი გადატანილი:

"ველოდებით ექსპერტიზის დასკვნებს, როგორც სამხარაულიდან აუტოფსიის დასკვნას, ასევე, ლუგარის ლაბორატორიიდან ველოდებით კვლევებზე პასუხებს უშუალოდ ჰქონდა თუ არა გადატანილი მეგი ბაქრაძეს კორონავირუსი, ასევე, ჩვენ ველოდებით სისხლის სამართლის საქმის მასალებს, რომელიც გამოძიების ამ ეტაპზე არ გვაქვ გადმოცემული. განსაკუთრებით საინტერესოა კლინიკა "იმედის" თანამშრომლების გამოკითხვის ოქმები, ვინც იმყოფებოდა მეგი ბაქრაძესთან ვაქცინაციის პროცესში და ვინც გაუწია შემდგომ დახმარება", - განაცხადა ამაღლობელმა.

შეგახსენებთ, რომ 27 წლის მედიკოსს მეგი ბაქრაძეს "ასტრაზენეკას" ვაქცინის გაკეთების შემდეგ ანაფილაქსიური შოკი განუვითარდა, რის შედეგადაც, რამდენიმე საათში გარდაიცვალა.