ინფექციური საავადმყოფოს დირექტორი, ამირან გამყრელიძე , ვაქცინაციის აუცილებლობაზე საუბრობს და აცხადებს, რომ საქართველო დგას გზაგასაყარზე და აქტიურობა ვაქცინაციის მხრივ აუცილებელია, რადგან მისივე თქმით, ეს გვაძლევს საშუალებას, რომ სტაბილური და კარგი ეპიდსიტუაცია შევინარჩუნოთ და კიდევ უფრო გავაუმჯობესოთ.

გამყრელიძის ინფორმაციით, სულ აცრილი გვყავს 4300 პიროვნება, რაც მისივე შეფასებით, ძალიან ცოტაა.

"დღეს საქართველო დგას გზაგასაყარზე და გვაქვს ორი პერსპექტივა. პირველი - ვაქტიურობთ ვაქცინაციის მხრივ და ეს გვაძლევს საშუალებას, რომ სტაბილური და კარგი ეპიდსიტუაცია შევინარჩუნოთ და კიდევ უფრო გავაუმჯობესოთ. სამწუხაროდ, თავიდან ძალიან დაბალი აქტივობა იყო. სულ აცრილი გვყავს 4300 პიროვნება, რაც ძალიან ცოტაა. იმისათვის, რომ გავიდეთ სამიზნე მონაცემებზე და წლის ბოლომდე დაახლოებით 1,7 მილიონი ადამიანი ავცრათ, დღეში უნდა ავცრათ 3000 ადამიანი. 15-ში დავიწყეთ აცრა და მხოლოდ 4300 ადამიანია აცრილი, რაც იყო საგანგაშო. საბედნიეროდ, დღეის მონაცემებით, ამ 4 300 ადამიანის გარდა დარეგისტრირებულია კიდევ 11 000-ზე ოდნავ მეტი ადამიანი" , - ამბობს გამყრელიძე "იმედის" ეთერში.