"თბილისის მერია ნებისმიერი სცენარისვის მზად არის" - სამხარაულის ექსპერტიზის საგანგაშო დასკვნის შემდეგ ბროწეულის ქუჩის მაცხოვრებლები ხელისუფლებას განმარტებას სთხოვენ

საზოგადოება - 16:48, 26 Mar, 2021

1874

ბროწეულის ქუჩის მაცხოვრებლების პროტესტი - მოსახლეობა დედაქალაქის მერიისგან განმარტებას ითოხვს. ადგილობრივებმა მერის მოადგილეს ირაკლი ბენდელიანს უარი უთხრეს, ისინი შეხვედრას კახა კალაძესთან ითხოვენ, თუმცა თბილისის მერი ჯამრთელობასთან დაკავშირებული პრობლემებისგამო მკურნალობას კლინიკაში გადის.
თავად ბენდელიანი მზაობას გამოთქვამდა, ყველა კითხვაზე ამომწურავი პასუხი გაეცა ადგილობრივებისთვის. მისი განცხადებით, თბილისის მერია სრულად არის მზად ნებისმიერი სცენარის განვითარებისთვის.

პარალელურად, სამხარაულის სახელობის ექსპერტიზის ბიუროს დასკვნა დღეს გახდა ცნობილი, რომლის მიხედვითაც, მაჭავარიანის ქუჩის მიმდებარე ფერდობზე, კლდოვან ქანებში განვითარებულია მძლავრი კლდეზვავური ტიპის მეწყრული პროცესი. არის ალბათობა, რომ მეწყრული სხეულის გზის მიმართულებით გადაადგილება, ფერდობის სხვადასხვა ნაწილში წარმოქმნის ახალ მეწყრულ ნაპრალებსა და საფეხურებს.

დასკვნის მიხედვით, მოსალოდნელი გართულებების თავიდან ასაცილებლად, საჭიროა, დაუყოვნებლივ შეწყდეს ვაშლიჯვარი-ნუცუბიძის დამაკავშირებელი გზის შესაბამის მონაკვეთზე ყველა სახის სატრანსპორტო საშუალების მოძრაობა; ასევე, საჭიროა განხორციელდეს მეწყრული პროცესის უწყვეტი მონიტორინგი და ისიც, რომ დაიგეგმოს და განხორციელდეს მეწყრული პროცესის სტაბილიზირებისთვის საჭირო შესაბამისი ღონისძიებები:

"მეწყერი იწყება ფერდობის შუა ნაწილში და გრძელდება ფერდობის ძირის მიმართულებით;მეწყრის საშუალო სიგანე 100 მეტრია;ვიზუალური დაკვირვებით დგინდება, რომ მეწყრული სხეულის სიმძლავრე 10 მეტრს აღწევს;მეწყრული საფეხურების სიმაღლე 0,2მ-დან 1მ-მდე მერყეობს;ნაპრალების ღიობის სიგანე 0,5მ-დან 1,5მ-მდე იცვლება.სამხარაულში დაასკვნეს ისიც, რომ მეწყრული პროცესების წარმოქმნა-განვითარება უკავშირდება გრავიტაციულად დაძაბულ ფერდობზე მისი ამგები ქანების წონასწორობის რღვევას, რაც შესაძლებელია განპირობებული იყოს, როგორც ბუნებრივი, ასევე ტექნოლოგიური ფაქტორებით" - წერია დასკვნაში.